Vigo, das cidades máis afectadas en Galicia pola folga de Renfe

Varios trens serán cancelados nunha xornada con moito tránsito de viaxeiros.

ferrocarril
Tren cercanias /Miguel Nuñez

A protesta convocada polo sindicato SFF-CXT entre as 12,00 e as 16,00 horas e de 20,00 a 0,00 horas prevista para este mércores 14 de agosto afectará a un total de 32 trens. Renfe estableceu uns servizos mínimos do 68% na media distancia de Galicia, co que a folga se materializará na supresión de 20 trens de media distancia e seis de longa distancia.

Tamén quedarán suprimidos os trens Galicia-Euskadi, o tren hotel que conecta Galicia e Madrid e os internacionais Vigo-O Porto-Vigo da tarde.

En concreto, segundo informa a central nun comunicado, serán unha vintena de trens con percorrido dentro da comunidade, como o Vigo-Urzaiz-A Coruña das 11,15 horas e o Santiago-Vigo-Guixar das 22,00 horas.

Tamén afectados veranse 10 trens de longo percorrido, entre eles un Vigo Guixar-Porto e un Madrid-A Coruña, e outros dous trens con percorrido xa o día 15 de agosto (Monforte-Pontevedra e A Coruña-Ferrol).

Así, continuarán os paros, despois de que CXT remitise unha carta ao Ministerio de Fomento na que solicita a súa intervención no conflito. “O que estamos a pedir é un aumento do nivel de contratación atendendo á falta de persoal existente, que está a repercutir negativamente no servizo”, lembra a organización.

En concreto, refire carencias en condución, intervención, venda de billetes, mantemento de trens e administración e xestión. De non chegar a un acordo, CXT continuará con paros o 30 de agosto e o 1 de setembro.

DEIXAR UN COMENTARIO

Please enter your comment!
Please enter your name here