O primeiro día da selectividade en Galicia saldouse con normalidade no desenvolvemento das probas, aínda que a xornada da tarde contou con algunha anécdota que chegou a afectar a toda a comunidade autónoma, en concreto, durante o exame de Lingua Galega II.
A proba estaba prevista para as 15,30 horas, pero un descoido nunha comisión en Vigo levou a abrir antes de tempo o paquete no que levaban os exames, o que obrigou a cambiar o cuestionario por outro de reserva en todos os centros.
Esta incidencia obrigou a atrasar a proba, pero apenas uns minutos. Segundo explicaron desde a CIUG, este tipo de casos obrigan a dar a orde de substituír o modelo titular por un exame alternativo, por unha cuestión de “garantías” e de seguridade” e para evitar o perigo de que as preguntas circulen antes de tempo.
A pesar deste leve atraso, o caso non pasou de ser un pequeno descoido e unha anécdota máis deste tipo de xornadas, e os exames desenvolvéronse con total tranquilidade.
