O delegado do Goberno en Galicia, Javier Losada, eloxiou nun acto ás mulleres que deron un paso á fronte a pesar dos “convencionalismos” da “sociedade machista” de hai 40 anos para converterse nas primeiras en formar parte da Policía Nacional.
Así se pronunciou durante a inauguración na cidade olívica da exposición ’40 Anos da incorporación da muller á Policía Nacional’. A mostra poderá visitarse no edificio da Andrómena do Porto de Vigo en horario de 11,00 a 14,00 horas e de 17,00 a 21,00 horas ata o próximo 9 de xuño.
Durante a presentación, Javier Losada sinalou que, o día no que a muller se sumou ao corpo de seguridade, que tivo lugar en xuño de 1979, gañaron a Policía, “a sociedade” e “a democracia”. Así, sinalou que, aínda que naquel momento só se incorporaron 42 profesionais, na actualidade suman 9.000.
Neste sentido, insistiu na importancia de que a porcentaxe de mulleres neste corpo de seguridade, que en Galicia se sitúa no 12,95 por cento, se incremente. Ademais, marcou a fenda salarial, a corresponsabilidade familiar, o acceso a cargos directivos e a conciliación como os retos a abordar para conseguir a igualdade de xénero.
NOVO “TALENTO”
Neste contexto, a subdirectora xeral do Gabinete Técnico da Policía Nacional, Eulalia González, afirmou que a presenza da muller no corpo de seguridade permitiu incorporar o “talento” destas profesionais e novas “sensibilidades” ao persoal.
Así mesmo, incidiu no feito de que algunhas mulleres xa realizaban funcións policiais antes de 1979, pero apuntou que non foi ata ese momento cando se converteron en parte do corpo. Así, puxo en valor que aquelas 42 “pioneiras” se atrevesen a “romper moldes”.
O alcalde de Vigo, Abel Caballero, sinalou ademais o feito de que a presenza da muller na Policía xa forma parte dunha “normalidade democrática”.
Durante o acto, Javier Losada e Eulalia González tamén lembraron á policía Vanessa Lage, falecida en acto de servizo na cidade olívica en novembro de 2014.
