Guerra no sector da limpeza do Cunqueiro

Auxiliares de enfermaría volverán concentrarse en protesta contra a "imposición" de tarefas de limpeza e a dirección abre expediente contra os traballadores que non recollen os colectores de roupa sucia.

Protesta do persoal sanitario do Álvaro Cunqueiro / jesus-manuel.com

Continúa a guerra laboral no sector de limpeza do hospital Álvaro Cunqueiro. O colectivo de auxiliares de enfermaría volverán concentrarse este luns en protesta pola “imposición” das tarefas de limpeza que “non lles corresponden” e que, din, se ven “obrigados” a realizar baixo ameazas de “graves sancións e castigos” por parte da dirección do centro.

A través dun comunicado, o colectivo de Técnicos en Coidados Auxiliares de Enfermaría (TCAEs) informa que este luns está convocada unha reunión de persoal e sindicatos para abordar a situación aberta logo de que expirase o contrato da empresa externa que xestionaba a recollida de roupa sucia no hospital vigués.

A dirección do Álvaro Cunqueiro comezou a expedientar aos traballadores que se neguen a levar a cabo estas tarefas, xa que lembran que existen “sentenzas xudiciais” que avalan que estes traballos sexan encomendados aos auxiliares de enfermaría.

A través dun comunicado difundido pola Xerencia da área de Vigo, apuntan que estes fallos xudiciais establecen que “depositar a roupa sucia nos puntos habilitados constitúe unha competencia nítidamente complementaria das obrigacións estatutarias de ‘facer camas’ ou ‘realizar o aseo e limpeza dos enfermos’, e que recoñecen a responsabilidade da Dirección para atribuírlles estas funcións” ao persoal TCAE.

LISTAS ‘POOL’

Así, os TCAEs apuntan que ante a negativa dos traballadores a levar a cabo a recollida da roupa, o hospital “está a contratar por noite a catro traballadoras e traballadores temporais sen praza fixa” que figura na lista ‘Pool’, destinada a cubrir baixas de última hora ou reforzar persoais en momentos puntuais de alta carga de traballo.

Auxiliares e enfermeiros do Cunqueiro protestan contra a xerencia do hospital / jesus-manuel.com

“A estas persoas chámanas para realizar un traballo que lles corresponde, coaccionando e ameazando con penalizalas e colocalas ao final da lista se se negan”, indica o comunicado, que engade que estes traballadores realizan as tarefas de limpeza “vixiadas” por persoal de seguridade e, en ocasións, mesmo pola supervisora xeral.

Deste xeito, unha vez que cumpren coa recollida da roupa sucia, os traballadores das listas “son recolocadas” noutras áreas do hospital ata que cumpren coa quenda, segundo denuncia o colectivo de auxiliares.

“COACCIÓNS” E “AMEAZAS”

A continuación, os TCAEs aseguran que a dirección da área sanitaria de Vigo enviou unha carta “a cada” traballador para lembrarlles que “teñen a obriga” de realizar as tarefas de recollida de roupa, algo que “non está recollido” no seu estatuto.

A continuación, denuncian que a xerencia expón na súa misiva que no caso de que os empregados se neguen a levar a cabo ese labor “expoñense a graves sancións que poden levar nalgúns casos a castigos como non poder presentarse a unha oposición, suspensión de emprego e soldo ou a perda de vacantes”.

Así as cousas, os auxiliares de enfermaría censuran que á dirección do hospital “preocúpalle a mala imaxe que dan as bolsas de roupa sucia amoreadas nos corredores” pero, por contra, “non se preocupan dos cuartos sucios” porque “non están á vista” dos pacientes e usuarios.

DEIXAR UN COMENTARIO

Please enter your comment!
Please enter your name here