O alcalde de Vigo, Abel Caballero, sinalou que a tramitación, por parte da Xunta, dos proxectos sectoriais PS1 e PS6 dos terreos da ETEA (áreas de viarias, espazos libres e usos complementarios) é “máis burocrática que real”, despois de “11 anos sen facer nada”.
Nunha rolda de prensa, o alcalde olívico explicou que o Concello presentou as súas consideracións no trámite de consultas previas na elaboración deses proxectos sectoriais. “O que nos sorprende é que o convenio sobre a ETEA é de 2008, e nos últimos 11 anos a Xunta non fixo nada. Agora inicia unha tramitación que é máis burocrática que real”, sentenciou Abel Caballero.
Con respecto á proposta do goberno galego, o Concello fixo varias observacións. Así, proponse que se conserven parte dos materiais dos viarios que a Xunta suxire eliminar ou que se xustifique a demolición dalgunhas edificacións. Así mesmo, segundo apuntou o rexedor, a Xunta propón un aparcadoiro en superficie, cando o plan sectorial inicial planeaba un aparcadoiro subterráneo.
