O Concello de Vigo, a piques de lograr a cesión dunha parte do paseo de Bouzas e facerse cargo da súa humanización

Paseo de Bouzas/ Miguel Núñez

O alcalde de Vigo, Abel Caballero, confirmou este luns os contactos do goberno municipal coa Dirección de Costas (dependente do Ministerio de Transición Ecolóxica) para lograr a cesión gratuíta ao Concello dunha parte do Paseo de Bouzas.

Nunha rolda de prensa, o rexedor explicou que a administración central trasladara a súa disposición a ceder ese espazo, e precisou que o Concello pretende que sexa unha cesión por un período longo de tempo, e sen que medie un convenio. “O mellor para ter as cousas ben é que sexan da cidade, e non cun convenio, que sempre é confuso”, engadiu Caballero.

O alcalde expresou a súa confianza en que esa cesión se poida materializar de forma “inmediata” para que o Concello se faga cargo da humanización e “rexeneración” da zona, porque “xa é un paseo urbano”.