A delegada territorial da Xunta en Vigo, Marta Fernández-Tapias, cualificou de “decepcionante” a visita deste luns á cidade da ministra de Ciencia e Innovación, Diana Morant, e lamentou que o Goberno “falte ao respecto” á urbe olívica ao cambiar a sede do Instituto Español de Oceanografía (IEO) por un foro de pesca.

“Esperabamos que a ministra viñese a darnos boas noticias a Vigo e anunciase que a cidade será sede do IEO, pero en lugar diso ofrécenos un foro que ata o momento non ten organigrama, estratexia definida, nin data concreta para a súa convocatoria”, lamentou Fernández-Tapias, referíndose a a anunciada mesa permanente da ciencia e da pesca.

A representante autonómica lembrou as palabras do alcalde, Abel Caballero, que asegurou que mediaría co Executivo para lograr o recoñecemento que se merece Vigo e mesmo chegou a asegurar que estaba “moi esperanzado” coa concesión da sede do IEO.

“En lugar diso asistimos a unha cortina de fume, unha escusa para obviar a realidade e o problema que atravesa o IEO e a decisión unilateral de desmembralo e deixar a Galicia sen opcións de acollelo por unha mera decisión política”, insistiu. A delegada subliñou que é unha nova “falta de respecto” a Galicia e a Vigo, ademais da o sector marítimo-pesqueiro, aos centros e ao persoal do IEO na Comunidade.