O concelleiro do goberno municipal de Vigo, Carlos López Font, que ostentou no seu día o cargo de responsable da área de Seguridade no Concello, afirmou este venres que actuou “dentro da legalidade”, tras prestar declaración como investigado nun xulgado pola aplicación dun decreto (sobre a organización do servizo de bombeiros) que foi anulado polos tribunais.
En declaracións aos medios tras esa comparecencia, que se alongou unhas dúas horas, o edil e portavoz do grupo socialista no Concello, aseverou que compareceu “ante a xustiza” como é a súa “obriga”, pero matizou que o fixo no marco dunhas dilixencias previas, que se seguen o xulgado de instrución número 5 da cidade.
Estas dilixencias teñen a súa orixe nunha denuncia penal que interpuxo o sindicato CIG en relación con ese decreto, aprobado polo goberno local en febreiro de 2019. O decreto, entre outras medidas, suspendía os descansos dos bombeiros e impuña de facto a realización de horas extras e xornadas maratonianas, debido á falta de efectivos.
O xulgado do Contencioso Administrativo número 1 de Vigo anulouno, e a súa sentenza foi posteriormente ratificada polo Tribunal Superior de Xustiza de Galicia (TSXG). Con todo, segundo denunciaron os sindicatos, o goberno local non fixo nada por liquidar a situación e, de feito, tiveron que solicitar a execución da resolución xudicial.
Nese contexto, a CIG presentou en agosto do ano pasado unha denuncia penal pola suposta comisión dun delito contra os dereitos dos traballadores e outro de prevaricación administrativa. Como resultado, este venres compareceron como investigados Carlos López Font e o xefe de servizo da área de Seguridade, Antonio V.M..
“CONVENCIDO DE QUE ACTUEI DENTRO DA LEGALIDADE”
“Estou convencido de que actuei dentro da legalidade”, afirmou o edil socialista á súa saída do xulgado, e confirmou que a denuncia interposta está relacionada con ese decreto, aínda que eludiu aclarar se, tras a anulación da dita orde, o goberno municipal tomou algunha medida para cumprir a sentenza.
Segundo Carlos López Font, na súa declaración no xulgado de instrución número 5 manifestou que “en todo momento” a súa actuación se axustou á lei, “e sobre todo ao interese da cidade, dos seus cidadáns, da súa integridade, tanto das súas vidas como das súas propiedades”.
