O Concello de Vigo abriu expediente sancionador á Xunta de Galicia pola instalación dunha lona no edificio no que construíu un albergue de peregrinos, no Berbés, no casco vello.
Segundo anunciou o alcalde, Abel Caballero, o departamento de Urbanismo abriu este expediente despois de varias advertencias á Xunta sobre a colocación dunhas lonas co logotipo do Xacobeo e o texto ‘Rede pública de Albergues do Camiño de Santiago’.
O rexedor sinalou que a instalación desas lonas na fachada do edificio rehabilitado contravén “gravemente” a ordenanza. “Avisámolo unha vez, e non fixeron caso; avisámolo unha segunda vez, e non fixeron caso, e ademais, enganaron aos inspectores de Urbanismo”, censurou Caballero.
Segundo explicou, a Xunta retirou as lonas cando os técnicos foron a supervisar a obra para outorgar a licenza de actividade, “se non, non se deu a licenza”. “Retiráronas para a visita dos inspectores e volvéronos a pór”, denunciou.
“É a primeira vez que o Concello se ve obrigado a abrir un expediente por incumprir a norma. Pregúntolle a Feijóo, se vostedes non cumpren as ordenanzas, como lles piden aos cidadáns que as cumpran”, afirmou o alcalde, e lembrou que “para pedir aos cidadáns que cumpran as normas, hai que ter a autoridade moral de cumprilas”.
RESPOSTA DA XUNTA
En resposta a este anuncio, o Goberno galego lamentou que o alcalde está “en contra” do Xacobeo e do Camiño de Santiago, “unha fonte de ingresos para hostaleiros e comerciantes”.
Precisamente, a delegada territorial da Xunta en Vigo, Marta Fernández-Tapias, sinalou que o rexedor “busca a confrontación” coa administración autonómica, “precisamente” cando o Goberno galego anuncia que os hostaleiros van colocar sinalización do Camiño nos seus locais, dado que o Concello rexeita instalar esa sinalización. “As lonas moléstanlle, igual que lle molesta a sinalización do Camiño, que é un símbolo”, sentenciou.
