InicioPolíticaA oposición a Abel Caballero apoia a folga dos traballadores do mantemento...

A oposición a Abel Caballero apoia a folga dos traballadores do mantemento de zonas verdes

PP, Marea e BNG esixen ao goberno local que faga cumprir á empresa os pregos do servizo.

PUBLICADO O

Os partidos da oposición no Concello de Vigo (PP, Marea de Vigo e BNG) trasladaron este mércores o seu apoio aos traballadores da concesionaria do mantemento de zonas verdes, tras o anuncio de folga indefinida a partir da próxima semana, e instaron ao goberno local a facer cumprir á empresa os pregos do servizo.

O portavoz do grupo ‘popular’, Alfonso Marnotes, lembrou que “hai anos” que as zonas verdes da cidade están “abandonadas” e que a situación “non é culpa dos traballadores”. “Ao contrario, cada vez son menos, e non pode ser que se lles deban cantidades, que non se cumpra o prego”, denunciou o edil do PP.

Marnotes lamentou que o goberno local “non sabe manter” as zonas da cidade que refoma e, tras os traballos e as inauguracións, “abandónaas” e déixaas “sen mantemento”. De feito, incidiu, hai uns anos chegou a haber 130 empregados na concesionaria de parques e xardíns, e agora apenas superan os 100, a pesar de que a superficie que teñen que atender incrementouse.

“E o responsable sempre é o mesmo, Abel Caballero”, proclamou, á vez que criticou a falta de xestión do concelleiro desa área, Anxo Rivas, que “nin está nin se lle espera”.

Pola súa banda, o grupo municipal Marea de Vigo criticou que a empresa concesionaria “usa a escusa do COVID” para incumprir o convenio colectivo e o prego de condicións da adxudicación, que contempla un mínimo de 109 traballadores fixos (mentres que o comité denuncia que se están facendo contratos parciais ou por horas).

Respecto diso, Rubén Pérez advertiu de que o alcalde non pode permitir a unha empresa concesionaria actuar así, “sen control público”, e instou o goberno local a “auditar e controlar” as condicións laborais do persoal das concesionarias, “xa que o Concello é responsable do cumprimento da lexislación laboral” e de que “non se destrúan os dereitos laborais adquiridos”.

Mentres, o concelleiro do BNG, Xabier Pérez Igrexas, fíxose eco das denuncias do comité, e criticou que a UTE concesionaria non só non cumpre o cociente de traballadores fixos, senón que debe ao persoal dous meses do plus de tóxicos e incumpriu as condicións do pago de liquidacións tras o cambio de concesionaria.

Segundo lembrou, o Concello adxudicou hai uns meses este servizo por máis de 33 millóns de euros, por un período de 5 anos, e non se pode permitir que a empresa, que presta un servizo municipal, “vulnere dereitos laborais”. “Xa basta da barra libre que impuxo Caballero para as concesionarias, estes traballadores están nun servizo que se paga con diñeiro público e o goberno local non pode mirar para outro lado”, incidiu.

ÚLTIMAS

Asistidas un pai e a súa filla en Vigo tras producirse un incendio na súa vivenda

Dúas persoas, un pai e unha filla, necesitaron asistencia en Vigo este xoves tras producirse...

Emilio Sotelino ou a Asociación de Viúvas Demócratas entre os Vigueses Distinguidos 2024

O pleno de Vigo aprobou este luns por unanimidade nunha sesión extraordinaria os novos Vigueses...

O goberno de Vigo aproba o marco orzamentario ata 2027 e prevé investimentos por valor de 33 millóns cada ano

O alcalde de Vigo, Abel Caballero, anunciou que o goberno local aprobou o marco...

Pechados parques e espazos arbóreos da cidade de Vigo debido ao temporal

O Concello de Vigo restrinxiu por seguridade o acceso aos parques e espazos arbóreos...