O BNG de Vigo denunciou o incumprimento do regulamento do pleno por parte do alcalde, Abel Caballero, que duplicou o tempo de intervención do PSOE na sesión extraordinaria celebrada este xoves para aprobar a urbanización do Barrio do Cura.
Segundo sinalou o edil nacionalista, Xabier Pérez Igrexas, o alcalde reduciu a 4 minutos a súa intervención na sesión, mentres que os representantes do PP e Marea de Vigo puideron falar 10 minutos cada un, e o partido do goberno local, o PSOE, tivo un total de 25 minutos de intervención.
No pleno extraordinario deste xoves interveu en primeiro lugar a concelleira socialista de Urbanismo, María José Caride, seguida polos representantes de BNG, Marea e PP (por orde de menor a maior número de edís). A continuación, permitiuse unha intervención do portavoz socialista, Carlos López Font, antes de que Caride pechase o debate.
Durante a sesión, o propio Xabier Pérez Igrexas, esgrimindo “unha cuestión de orde”, lembrou ao alcalde que estaba a incumprir o regulamento ao permitir esa dobre intervención por parte do grupo socialista. Abel Caballero limitouse a responder que tomaba “nota” e retirou a palabra ao concelleiro do BNG.
Tras este incidente, Pérez Igrexas abandonou momentaneamente o salón de plenos e logo incorporouse para a votación. O edil denunciou a decisión “antidemocrática, autoritaria e sectaria” do rexedor, ao que acusou de pretender “amordazar” ao BNG no pleno.
Segundo subliñou, o regulamento deste órgano establece de forma “clara e incontestable” que o grupo de goberno só dispón dunha quenda de intervención e un final de réplica. “Se o PSOE consideraba que a concelleira de Urbanismo non tiña capacidade bastante para explicar e defender de maneira solvente a posición do seu grupo, terían que reconsiderar se é a persoa indicada para intervir e para dirixir a área de Urbanismo”, sentenciou.
Finalmente, Pérez Igrexas pediu a Caballero que rectifique o seu “talante antidemocrático” e respecte as “regras do xogo”. “Xa estamos adoitados á permanente falta de respecto ao pleno, que é faltarlle ao respecto ás viguesas e vigueses”, engadiu, en alusión ás constantes “ausencias” do alcalde nas sesións plenarias.
