O PP critica que se substitúa na placa do campo de fútbol de Sárdoma o nome de Corina Porro polo de Abel Caballero

O cambio débese ás novas obras nas instalacións.

Corina Porro / © Miguel Núñez.

O portavoz do Grupo Municipal Popular de Vigo, Alfonso Marnotes, denunciou a substitución dunha placa conmemorativa da remodelación dun campo de fútbol por unha nova na que figura o nome do alcalde, Abel Caballero, por mor dunhas obras que considerou de menor calado.

Marnotes sinalou que o foi o goberno de Corina Porro (PP) o que “remodelou completamente o campo de fútbol do Sárdoma”, tal e como apuntou que se reflectiu nunha placa conmemorativa instalada no marco do acto de inauguración.

Con todo, lamentou que este marcador histórico fose substituído por outro no que, en lugar de figurar o nome da exalcaldesa, se alude á inauguración das obras recentemente realizadas por parte do goberno local á fronte do que se atopa Abel Caballero.

Ante esta situación, Marnotes advertiu da posibilidade de que “calquera poda que se faga na Alameda” motive que se instale unha placa na que se sinale que a mesma “foi inaugurada” polo alcalde.