O portavoz popular do Concello de Vigo, Alfonso Marnotes, criticou este mércores que o alcalde, Abel Caballero, “minta aos viaxeiros do Imserso” cando lles asegura que a próxima tempada sairán máis avións desde Peinador ou que os buses partirán de Vigo, xa que a oferta “está conxelada e adxudicada ata 2022”.
“O alcalde di que o ano que vén a licitación xa será completamente distinta. Pois ben, o actual concurso acábase de adxudicar por dúas tempadas, 19/20 e 20/21 , así que non haberá concurso ata dentro de dous anos como mínimo e poida que ata dentro de catro ou cinco se decide prorrogar o contrato”, indicou Marnotes nunha rolda de prensa, segundo recolle o PP nun comunicado.
Ademais, Abel Caballero afirmou que confiaba no aumento da oferta de voos en Peinador se se cancelan as viaxes a Cataluña. “Outra mentira. A día de hoxe as viaxes a Cataluña están vendidos nun 90% desde aquí. Por tanto, esta posibilidade non se dá. É máis, o Imserso xamais incrementou a oferta duns destinos porque caia a demanda noutros”, sentenciou.