Abel Caballero: “O que Feijóo reclama non é o AVE a Galicia, é só a unha parte, a Vigo non chega”

O alcalde critica que os viaxeiros vigueses, para ir a Madrid, deberán primeiro desprazarse á capital compostelá.

Obras do ave
Obras do AVE no concello ourensán de Vilariño de Conso / © Miguel Núñez

O alcalde de Vigo, Abel Caballero, denunciou este venres que “o que Feijóo reclama” cando fala de prazos e de execución de obras de alta velocidade ferroviaria “non é o AVE a Galicia, é o AVE a unha parte de Galicia” porque “a Vigo non chega”.

Caballero lembrou que a alta velocidade ferroviaria non chega á cidade porque “Fraga decidiu que non chegase, coa señora Corina Porro sentada ao seu lado”.

Así mesmo, abundou, a que foi ministra de Fomento do PP, Ana Pastor, tivo o AVE Vigo-Madrid directo por Cerdedo “metido nun caixón durante cinco anos” e tivo que ser o Goberno de Pedro Sánchez o que “desbloqueou” este proxecto, impulsando o estudo hidroxeolóxico e o de impacto ambiental.

“Non lle escoitei a Feijóo nin unha vez reclamar o AVE directo Vigo-Madrid por Cerdedo, porque quere que vaiamos por Santiago”, denunciou, e lembrou que, tal e como está o trazado, a alta velocidade entra en Galicia por Ourense e logo conecta con Santiago, de maneira que os viaxeiros vigueses, para ir a Madrid, deben primeiro desprazarse á capital compostelá.

Segundo o alcalde, é un AVE que obriga aos vigueses a ir “100 quilómetros para atrás, para poder ir outros 100 quilómetros cara a adiante”. “En tanto non haxa AVE directo Vigo-Madrid, non haberá AVE a Galicia”, proclamou.