InicioPolíticaA Xunta asegura que os plans sectoriais da ETEA estarán aprobados en...

A Xunta asegura que os plans sectoriais da ETEA estarán aprobados en 2020 e lamenta o atraso do municipal

Así o trasladou aos medios a conselleira de Medio Ambiente, Territorio e Vivenda, durante unha visita ás instalacións da ETEA, no barrio vigués de Teis, e na que sinalou que os promotores de cada ámbito poderán iniciar a execución dos seus proxectos.

PUBLICADO O

A Xunta avanzou este mércores que todos os proxectos sectoriais dos terreos da antiga ETEA, Escola de Transmisións e Electrónica da Armada, estarán aprobados en 2020, á vez que lamentou que o único plan pendente, o PS-4, é o que corresponde a dotacións deportivas que promove o Concello de Vigo e que “ata a data non iniciou ningún trámite“.

Así o trasladou aos medios a conselleira de Medio Ambiente, Territorio e Vivenda, Ángeles Vázquez, durante unha visita ás instalacións da ETEA, no barrio vigués de Teis, e na que sinalou que, unha vez aprobados os plans sectoriais, os promotores de cada ámbito poderán iniciar a execución dos seus proxectos.

Os terreos da antiga ETEA, que foron adquiridos en 2002 por Zona Franca, foron vendidos despois a Xunta de Galicia e concello, aínda que a primeira aínda non pagou toda a súa parte, e o consistorio non desembolsou nada a día de hoxe. Posteriormente, os terreos dividíronse en varios plans sectoriais diferentes, en función dos usos futuros.

Así, o PS-1, que inclúe os viarios, espazos libres e outras infraestruturas, comeza agora o período de exposición pública tras finalizar a tramitación ambiental, e será a Xunta a que execute a urbanización, mentres que Zona Franca e o CSIC encargaranse dos edificios.

Os plans PS-2 e PS-3 corresponden ao ámbito científico-tecnolóxico. No primeiro deles inclúense varias instalacións, será promovido polo CSIC, e acaba de finalizar a súa tramitación ambiental, polo que se prevé que sexa sometido a exposición pública no primeiro trimestre de 2020.

O PS-3 é, segundo sinalou a conselleira, o máis avanzado na súa tramitación, e será desenvolvido pola Universidade de Vigo, que se encargará das obras para adaptar os edificios Siemens e Faraday a usos docentes, administrativos e de investigación.

O único plan sectorial desenvolvido na súa totalidade é o o PS-5, que contempla os espazos recreativos (pistas de patinaxe e parque infantil) que habilitou hai anos a Xunta. Así mesmo, o PS-6, proxecto de usos complementarios que impulsará o goberno autonómico e que inclúe a construción dunha residencia de maiores, xa acabou o período de consultas e será sometido a información pública antes de final de ano.

Así as cousas, Ángeles Vázquez lamentou que o único plan sectorial do que non se iniciaron os trámites no PS-4, que debe desenvolver o Concello de Vigo, e que contempla dotacións e equipamentos deportivos (xa habilitados polo consistorio nesa parcela), e parque urbano.

ÚLTIMAS

Asistidas un pai e a súa filla en Vigo tras producirse un incendio na súa vivenda

Dúas persoas, un pai e unha filla, necesitaron asistencia en Vigo este xoves tras producirse...

Emilio Sotelino ou a Asociación de Viúvas Demócratas entre os Vigueses Distinguidos 2024

O pleno de Vigo aprobou este luns por unanimidade nunha sesión extraordinaria os novos Vigueses...

O goberno de Vigo aproba o marco orzamentario ata 2027 e prevé investimentos por valor de 33 millóns cada ano

O alcalde de Vigo, Abel Caballero, anunciou que o goberno local aprobou o marco...

Pechados parques e espazos arbóreos da cidade de Vigo debido ao temporal

O Concello de Vigo restrinxiu por seguridade o acceso aos parques e espazos arbóreos...