O alcalde de Vigo, Abel Caballero, asegurou este luns que non existe o atraso denunciado pola Xunta na licitación do estudo sobre o abastecemento de auga á cidade, e que a Confederación Hidrográfica Miño-Sil publicará a licitación o vindeiro xoves.

O rexedor incidiu en que o proxecto vai “perfectamente en prazo”, e lembrou que será cofinanciado por Concello, Ministerio de Transición Ecolóxica e Xunta. “Eu quixen que o Concello estea aí, sen ter obriga, porque quero vixiar á Xunta, non me fío”, apuntou o alcalde.

Segundo denunciou, o Goberno galego (que advertiu de que a licitación do estudo se atrasara, e obrigará a tramitar unha addenda ao actual convenio) “dedícase a inventar atrasos, cando non hai ningún”, e faino para “ocultar” o feito de que non cumpriu as súas obrigas con respecto ao abastecemento de auga á área viguesa.

Así, o rexedor olívico incidiu en que, desde 2011 en que el mesmo advertiu dos problemas, o Goberno galego “non fixo nada”, “non moveu un só papel” para facer o transvasamento de emerxencia e, por contra, aumentou o caudal ecolóxico que chega á presa de Eiras.