David Regades: “Merecemos que o presidente da Fegamp sexa de Pontevedra”

Os socialistas da provincia pediranlle a Gonzalo Caballero que faga valer para a presidencia da Fedegación Galega de Municipios e Provincias o peso de Pontevedra.

Abel Caballero, Carmela Silva, Abel Losada, David Regades, Ana Mejías, no inicio da campaña electoral das Xerais / Miguel Núñez

O secretario xeral dos socialistas de Pontevedra, David Regades, pedirá ao PSdeG que o próximo presidente da Federación Galega de Municipios e Provincias (Fegamp) sexa un alcalde da provincia. “Merecemos e correspóndenos xogar ese papel”, asegurou.

No mandato que agora expira o presidente da Fegamp foi o alcalde do Barco (Ourense), Alfredo García. Agora, Regades defende que a “aposta decidida polo PSOE” en Pontevedra dá lugar a que “é o momento” de que esta institución estea dirixida por un alcalde ou alcaldesa da provincia.

Neste sentido, asegura que o PSOE vai gobernar a “máis de 619.000 persoas” en Pontevedra, o 66% da poboación –das cales máis de 497.000 persoas terán alcaldes socialistas, o 53% da poboación–. En cambio, subliña que o PP “queda acantoado en poucos concellos”, xa que gobernará sobre 200.000 persoas fronte á “ampla maioría” do PSOE.

De feito, cre que estes resultados do PP son “un fracaso estrepitoso do señor Rueda, que é o máximo responsable” na provincia dos populares. “Dicía (Rueda) que isto non era un fracaso do PP na provincia de Pontevedra (…) que veña alguén e cóntemo”, espeta.

ACORDOS PARA ALCALDES SOCIALISTAS

Así, debullou os alcaldes socialistas que haberá na provincia tras os últimos acordos de investidura. Sinala que é un “día de satisfacción” tras “o esforzo nestes últimos días”. Prevé que os socialistas ostenten ao redor dunha vintena de alcaldías, 10 delas por maiorías absolutas, mentres haberá outras nove a través de maiorías simples ou acordos de investidura ou goberno.

De tal forma, apunta que a socialista Marta Giráldez será alcaldesa en Meis, tras chegar a un acordo de investidura co BNG. Cos nacionalistas tamén se chega a un acordo para desbancar ao PP en Forcarei e investir á socialista Verónica Pichel.

En Redondela, Digna Rivas ten asegurada a súa elección como alcaldesa tras o acordo con BNG e AER, no que considera un “bastión que sempre foi clave”. Vilaboa, Tui e A Guarda tamén terán rexedores socialistas, á espera de explorar posibilidades de gobernos de coalición. Na Cañiza, “por primeira vez en democracia”, haberá alcalde socialista con Luís Piña.

Pola súa banda, en Baiona haberá un pacto de goberno cun tripartito entre PSOE, Nós Baiona e BNG. Tamén nas últimas horas houbo acordo para que Eva García da Torre continúe como alcaldesa do Porriño. Avanzan as negociacións para que siga José Manuel Rei co bastón de mando de Caldas de Reis.

Remarca que o PSdeG cultivou nas últimas municipais o maior número de maiorías absolutas, cunha decena. Están en Vigo, Fornelos, Silleda, A Illa, Vilagarcía, Gondomar, Nigran, Cuntis, O Grove, Ponte Caldelas.

RESPALDO A GOBERNOS PROGRESISTAS

Ademais, Regades subliñou que o PSdeG dará o seu respaldo a alcaldías progresistas en municipios como Cangas e Moaña, onde están abertos a continuar coas negociacións para alcanzar pactos de goberno.

En Meaño, a dirección provincial aposta por un cambio político para “acabar con máis de 40 anos do PP”, que “lle fixo moito dano” aos veciños. “Poremos todas as ferramentas para que ese cambio sexa posible”, asegura. Xunto a isto, o responsable provincial socialista sinala que participará nos gobernos liderados polo BNG nos municipios de Pontevedra, Poio e Ponteareas.

Pola súa banda, seguen abertas negociacións en Catoira, Vila de Cruces, As Neves, Meaño e Salceda de Caselas, “sempre” coa aposta por gobernos de progreso.

DEIXAR UN COMENTARIO

Please enter your comment!
Please enter your name here