Unha réplica das Illas Cíes na futura Porta do Sol de Vigo

O Concello de Vigo licita a humanización e peonalización desta praza por 17 millóns de euros.

Porta do Sol en Vigo / viajesyrutas.es

O alcalde de Vigo, Abel Caballero, anunciou a licitación das obras de humanización e peonalización de Porta do Sol, que levarán o soterramento do tráfico, por un importe de 17 millóns de euros. En concreto, as ofertas poderán presentarse ata o próximo 28 de xuño, segundo detallou Abel Caballero durante unha rolda de prensa celebrada este martes na cidade olívica.

O prazo de execución das obras terá un período de dous anos e este proxecto estará sufragado na súa totalidade por fondos europeos a través da Estratexia de Desenvolvemento Urbano Sustentable e Integrado (Edusi).

O rexedor vigués anunciou que, ademais da humanización e as actuacións pertinentes respecto ao saneamento da zona, entre as accións que se desenvolverán tamén se incluirá a colocación dunha réplica das Illas Cíes no espazo de Porta do Sol.

En concreto, estas obras incluirán a reapertura do aparcadoiro subterráneo da zona, pechado hai varios anos, e o soterramento do tráfico para converter a zona nunha gran praza peonil.