PP de Vigo aposta por incrementar as axudas para protectoras de animais e fomentar a adopción de animais

Elena Muñoz con cans en Vigo / EP

A candidata do PP á Alcaldía de Vigo, Elena Muñoz, apostou por incrementar as axudas para asociacións e protectoras de animais e por pór en marcha campañas divulgativas que fomenten a adopción,a esterilización e o control dos animais.

Segundo recolleu o partido nun comunicado, a candidata á Alcaldía tamén avogou por crear “un servizo específico que loite contra os malos tratos animais” na cidade. Ademais, propuxo crear un rexistro de todos os animais e, en colaboración con Asociacións de Veterinarios, desenvolver campañas de vacinación.

Tamén apostou por abrir ata cinco parques caninos e delimitar dúas zonas que permitan a convivencia entre mascotas e o resto de usuarios no espazo de Praza da Miñoca. Así mesmo, expuxo recolocar a praia para mascotas da Calzoa e Foz para situala na parte final do areal de Samil co obxectivo de que o seu uso por parte dos animais non interfira co dos usuarios.