Abel Caballero cre que Sánchez vai arrasar en Vigo tras facer números coa asistencia a mítines

Lembra que Pablo Casado reuniu a 400 persoas; Pablo Iglesias "a unhas 1.600" e Pedro Sánchez "a 4.000, 2.000 arriba e 2.000 abaixo", asegura.

Pedro Sánchez con Abel Caballero e Gonzalo Caballero / Miguel Núñez

O alcalde de Vigo e presidente da agrupación socialista local, Abel Caballero, vaticinou este venres que o resultado de Pedro Sánchez na urbe olívica “vai ser excepcional“, e aludiu ás cifras de asistencia ao mitin que o candidato socialista ofreceu na cidade o pasado 16 de abril.

Segundo apuntou o rexedor, no mesmo escenario, o Auditorio Mar de Vigo, Pablo Casado reuniu a 400 persoas; Pablo Iglesias “a unhas 1.600” e Pedro Sánchez “a 4.000, 2.000 arriba e 2.000 abaixo” –a pesar de que o mesmo día do mitin do PSOE, fontes do partido cifraron a asistencia nunhas 3.000 persoas–.

En Vigo, o resultado de Sánchez vai ser excepcional. As enquisas que coñezo danlle ben ao PSOE, pero hai espabilar”, aseverou, e criticou que o candidato do PP, Pablo Casado, “xa abertamente confesa” que estaría disposto “a gobernar coa extrema dereita”. “Se cadra é que está moi tocado”, sentenciou.