Ana Pastor (PP) reivindica como logros seus os avances en infraestruturas en Vigo

O secretario xeral do PSdeG-PSOE, Gonzalo Caballero, di que a candidata 'popular' "non ten credibilidade.

28A.- Ana Pastor Defende En Vigo O Balance Do PP En Infraestruturas, FRONTE Aos Que Só Mostran "Fotos". PAULA XUSTO-EUROPA PRESS

A candidata do PP pola provincia de Pontevedra, Ana Pastor, reivindicou este venres o balance do seu partido en materia de infraestruturas cando gobernou, e contrapúxoo co dos partidos que se presentan con “fotos” e “propaganda”.

Nun acto celebrado en Vigo, ante a estación do AVE de Urzáiz, Ana Pastor lembrou que esa obra está en marcha grazas ao impulso que ela mesma lle deu desde o Ministerio de Fomento, e puxo en valor outras actuacións, como o investimento no Eixo Atlántico ferroviario, a ampliación e mellora do aeroporto de Peinador, as bonificacións na AP-9 entre Vigo e Pontevedra, a ampliación da ponte de Rande ou a autoestrada do mar.

“Hai partidos que nos presentamos cun balance de xestión e feitos, outros usan a propaganda e basean a súa campaña en meterse cos demais e en dicir o que lles gustaría facer e non fixeron”, sentenciou, e apuntou, a este respecto, que cando chegou ao Ministerio de Fomento, da estación de Urzáiz, só había “unha foto dunha escavadora” e un “buraco”.

TRANSFERENCIA DA AUTOESTRADA

Sobre a transferencia da AP-9, Ana Pastor afirmou que o PP vai seguir “reivindicando” dita transferencia, aínda que “con recursos”, e afeou ao Goberno de Pedro Sánchez que poña obstáculos por problemas xurídicos ou técnicos, cando “acaba de prometer ao PNV, polo seu apoio aos ‘decretazos’ dos venres, que lles vai a transferir a súa autoestrada”.

Así mesmo, prometeu que, se o PP goberna, se implementarán descontos do 25 por cento en todos os tramos desta autoestrada, a maiores das bonificacións que xa existen.

Á marxe dese compromiso, Ana Pastor tamén lembrou que os ‘populares’ levan no seu programa electoral a conversión en viaria urbano da AP-9 desde Torres de Padín ata o centro de Vigo, a nova autovía O Porriño-Vigo, ou a continuación da obra da A-57.

Finalmente, nun contexto máis local, referiuse á reforma da Avenida de Madrid na cidade olívica, e lembrou que o convenio para esa obra asinouno ela mesma, como ministra de Fomento, co alcalde, Abel Caballero. Desde entón, o Concello non avanzou no proxecto da obra, e “hai uns días fanse unha foto os socialistas para anunciar un maior investimento na reforma, sen explicar por que desde 2016 non está acabado o proxecto”, dixo.

RESPOSTA DO PSOE

O secretario xeral do PSdeG-PSOE, Gonzalo Caballero, proclamou este venres que as promesas do PP e da súa candidata por Pontevedra, Ana Pastor, en materia de infraestruturas ou sobre a transferencia da AP-9 “non teñen credibilidade” porque os ‘populares’ non avanzaron nesa liña cando gobernaron.

Así o manifestou nun acto de repartición de prograpanga electoral en Vigo, no que afeou aos ‘populares’ que “xogan con Galicia” e toman aos galegos por “parvos”.

Segundo lembrou, o PP gobernou en España con Rajoy durante sete anos, e segue gobernando en Galicia e, durante todo ese tempo, ademais de “deixar de gastar 2.000 millóns de euros orzados” para infraestruturas, non fixo “ningún avance” na transferencia da autoestrada, e mesmo “bloqueou” o seu debate no Congreso.

Todo iso, engadido ao feito de que o programa electoral “ultraconservador” de Pablo Casado expón unha recentralización das competencias, levou a Gonzalo Caballero a tachar de “cínicos” aos candidatos ‘populares’. “Se non o fixeron cando gobernaban, e agora queren recentralizar, non teñen credibilidade”, insistiu.

En contraposición, o secretario xeral dos socialistas galegos proclamou que será o PSOE o que “garanta” o desbloqueo das infraestruturas importantes para Galicia, e lembrou que foi o Goberno de Pedro Sánchez o que permitiu que o debate da transferencia da AP-9 chegase ao Congreso.

AGonzalo Caballero centrouse en apuntar a necesidade de “mecanismos para circular pola AP-9 a un menor custo” e pór fin ás “peaxes tan altas”, que son a “herdanza” que Aznar deixou aos galegos, ao prorrogar a concesión a Audasa ata 2048.

“Se o PSOE ten unha maioría ampla, imos avanzar para que non haxa unha suba continua das peaxes ata 2048, e traballaremos no tema da transferencia se ese é o mellor mecanismo para conseguir que os galegos non teñamos os custos que temos”, aseverou.

Finalmente, pediu non facer “demagoxia barata” coas peaxes, en alusión á promesa do PP de reducir as taxas na AP-9 nun 25 por cento e de impulsar a transferencia da autoestrada, e preguntou a Ana Pastor “por que non o fixo” cando era ministra nun goberno do PP