Ana Pontón aplaude o “proxecto de futuro para Rendondela” do candidato Xoán Carlos González

González aposta por "recuperar o protagonismo" do movemento asociativo e cultural da vila, ademais de promover iniciativas de igualdade para os maiores

Ana Pontón e Xabier P. Igrexas nunha rolda de prensa / BNG

A portavoz nacional do BNG, Ana Pontón, presentou este xoves ao candidato á Alcaldía de Redondela, Xoán Carlos González, do que destacou o seu “proxecto para o futuro” e o seu labor e experiencia desde a oposición neste Concello.

Segundo subliñou Pontón, o BNG “é a única alternativa para transformar o concello de Redondela”, cun candidato disposto a “liderar ese cambio” e que plantou cara aos “abusos do PP”. Para iso, a formación nacionalista conta “con ideas e persoas” e Xoán Carlos González, incidiu, traballará para que Redondela teña espazos e servizos públicos de calidade.

A este respecto, Ana Pontón lamentou a “lexislatura perdida” e a “discriminación” sufrida por Redondela, con “falsas promesas” como a supresión da peaxe da AP-9, a ría “sen sanear”, ou “un tren que pasa por Redondela pero que non dá servizo aos seus veciños”. “Temos que pór a Galicia no mapa e acabar coa discriminación, e para iso é necesario que confiemos nas nosas propias forzas. Este é o momento do BNG, e o 26 de maio e o 28 de abril podemos cambiar as cousas”, proclamou a líder da formación nacionalista.

Pola súa banda, Xoán Carlos González apostou por “recuperar o protagonismo” do movemento asociativo e cultural de Redondela na actividade política do concello, así como mellorar as políticas de benestar “tan deterioradas polo PP”, ou pór en marcha iniciativas de igualdade e destinadas ás persoas maiores.