Carmela Silva denunciará o PP por “calumnias” sobre o enchufe da súa cuñada

Proclama que está disposta a chegar ao Constitucional para defender a súa honra

Carmela Silva,nunha rolda de prensa na que anunciou a súa denuncia contra o PP por "difamacións" no caso da contratación da súa cuñada / EP

A tenente de alcalde de Vigo e presidenta da Deputación de Pontevedra, Carmela Silva, anunciou este martes que presentará unha denuncia nos tribunais contra o PP, en concreto, contra a súa presidenta local e portavoz municipal, Elena Muñoz. Silva alega “difamacións” e “calumnias” nas declaracións da ‘popular’ acerca da sentenza que condena un funcionario do Concello por prevaricar na contratación dunha cuñada da socialista.

Nunha rolda de prensa, a tenente de alcalde explicou que, ante a petición do PP de que se convoque un pleno extraordinario para pedirlle “responsabilidades políticas”, considera que iso conculca os seus “dereitos fundamentais”, polo que presentou un recurso por vía administrativa. Segundo ela mesma apuntou, o secretario municipal coincide en que os termos nos que o PP se expresa nesa solicitude de pleno conteñen afirmacións “mendaces”, é dicir, “mentiras”, ademais de que poden atentar contra o seu dereito á honra e á propia imaxe.

No entanto, recoñeceu, facendo valer o dereito de participación política, o secretario non accedeu a que se suspenda ese pleno, que se celebrará este mércores, despois da sesión ordinaria mensual. En todo caso, e dado que Carmela Silva considera que esa convocatoria “vai contra o ordenamento xurídico” e atenta contra os seus dereitos, avanzou que non estará presente na sesión. Solicitará, iso si, unha “copia da acta das intervencións” para engadilas á documentación (declaracións ante os medios, e outras manifestacións de Elena Muñoz) que presentará cando interpoña a denuncia.

DISPOSTA A CHEGAR AO TRIBUNAL CONSTITUCIONAL

A tenente de alcalde e presidenta da Deputación proclamou que defenderá a súa honra nos tribunais, e que mesmo está “disposta a chegar ao Tribunal Constitucional” nesa defensa. “A política non se pode converter nun vertedoiro e saltar todos os límites”, proclamou, ao tempo que rexeitou entrar nunha “escalada de crispación”. “O uso de palabras calumniosas déixollo ao PP e ao seu portavoz”, recalcou.