Caballero pide aos concellos da área metropolitana que “aforren auga como Vigo”

O alcalde avisa a Cangas, Moaña, Redondela, Soutomaior, Gondomar, Salceda, Nigrán, O Porriño e Mos da necesidade de seguir reducindo o consumo de auga.

Encoro de Zamáns / José Antonio Gil Martínez.
Encoro de Zamáns / José Antonio Gil Martínez.

Abel Caballero enviou unha misiva aos alcaldes de nove municipios da área metropolitana aos que se lles abastece de auga para que activen, como xa fixo Vigo, o ‘modo aforro’ de auga e que recomenden aos seus cidadáns un consumo responsable de auga.

A carta foi enviada aos rexedores de Cangas, Moaña, Redondela, Soutomaior, Gondomar, Salceda, Nigrán, O Porriño e Mos, para urxirlles que tomen estas medidas para frear o gasto de auga e poñan en marcha iniciativas para concienciar os cidadáns das súas vilas sobre a necesidade dun consumo responsable.

“Pido que aforren o mesmo que Vigo, porque de auga non estamos mal pero non hai previsión de choivas en moitas semanas”, alertou o alcalde vigués.

Neste sentido, avisou de que se vai a medir o consumo de auga de cada concello, xa que, segundo os datos que manexa, houbo “algún concello que consumiu un 11 por cento máis de auga que o ano pasado” entre os meses de xaneiro e agosto.

Con todo, en conxunto os municipios da área conseguiron reducir un dous por cento o consumo de auga, aínda que en Vigo o aforro ascendeu ao 4,5 por cento.

Nesta liña, Caballero volveu incidir na necesidade do transvasamento de emerxencia, pero o proxecto, lembrou, “atopouse coa feroz oposición que Feijóo fai a todo o que ten que ver con Vigo”. “Feijóo quere que quedemos sen auga”, sentenciou.

DEIXAR UN COMENTARIO

Please enter your comment!
Please enter your name here