A Xunta interésase polo carallo de mar

Mar destina preto de 210.000 euros ao estudo da bioloxía e xenética destes animais na ría de Vigo para a súa explotación comercial.

Tamaño do carallo de mar | / medium.com

carallo de mar, ou cogombro de mar, comeza a ser tido en conta en Galicia. O Consello da Xunta autorizaba hai unhas semanas a sinatura dun convenio de colaboración entre a Consellería do Mar, a Universidade de Vigo e Anfaco-Cecopesca para investigar a bioloxía, status poboacional e diversidade xenética da holoturia (holothuria forskali) na ría de Vigo, co obxectivo de fomentar unha xestión sustentable deste equinodermo.

A esta acción de investigación a Xunta destinará 209.480 euros e estará vixente ata o 31 de agosto de 2020.

Esta investigación denominada ‘Estudo da bioloxía, status poboacional e diversidade xenética da holoturia (holothuria forskali) na ría de Vigo’ estará coordinada polo Centro de Investigacións Mariñas (Cima) da Consellería do Mar e, dentro del, o grupo de investigación Ecimat da Universidade de Vigo e Anfaco-Cecopesca realizarán diferentes traballos de investigación.

Así, a Universidade de Vigo estudará aspectos relevantes para a xestión pesqueira do carallo de mar, entre eles, a distribución espacial e a estrutura da poboación da especie e biomasa do stock comercial.

Tamén o seu ciclo reprodutivo, esencial para o establecemento de vedas; o crecemento da especie, necesario para coñecer a idade á que os individuos formarán parte da biomasa explotable, e a talla de primeira madurez, para establecer unha talla mínima que asegure o éxito reprodutivo da poboación. Para o estudo do ciclo reprodutivo recollerán mostras nas enseadas de Barra, Liméns e Cangas, o banco de maior extracción deste recurso.

Carallo de mar / cis.es

Por outra banda, Anfaco-Cecopesca estudará a diversidade xenética e a estruturación da poboación do carallo de mar mediante a secuenciación do ADN. Ademais, tamén se encargará da estimación dos parámetros da poboación, que serán de grande utilidade para o manexo das pesqueiras, como por exemplo, a estrutura xenética espacial e a diversidade xenética.

A información derivada do proxecto poderá ser utilizada no futuro para avaliar o mantemento da diversidade xenética no tempo, así como monitorizar os efectos das pesqueiras sobre este recurso pesqueiro.
Ademais, a través deste tipo de accións, establécense liñas de traballo cos axentes interesados na xestión deste recurso. Co obxectivo de asegurar o debido cumprimento do acordo, crearase unha comisión de seguimento composta pola vicerreitora de Investigación e Transferencia da Universidade de Vigo, polo secretario xeral de Anfaco-Cecopesca e pola directora xeral de Desenvolvemento Pesqueiro ou persoas en quen deleguen.

EXPLOTACIÓN RECENTE

A Xunta destaca que a explotación do carallo de mar é moi recente. O primeiro plan de explotación aprobouse no ano 2015 para a Confraría de Cangas e este ano 2017 existen cinco plans aprobados para as confrarías de Cangas, O Grove, Coruña-Barallobre, Aldán-Hío e Vigo.

Este convenio súmase ao que asinaron esta semana a Consellería do Mar e a Universidade de Vigo para estudar a variabilidade espacial do ciclo reprodutivo da navalla na ría de Vigo e a súa aplicación á xestión pesqueira, coa finalidade de promover un método de explotación baseado en información biolóxica obtida de forma continua.

O CARALLO DE MAR

O ‘holothuria forskali’ atópase na zona intermareal, a pouca profundidade, por baixo do 20 metros. Este equinodermo presenta unha forma vermiforme, dunha cor pardo-negrudo e ata 25 cm. de lonxitude e presenta unha superficie rugosa ao ter sete fieiras de tubérculos cónicos. Aliméntanse filtrando sedimentos do fondo mariño que introduce no seu tubo dixestivo grazas a 20 tentáculos.

DEIXAR UN COMENTARIO

Please enter your comment!
Please enter your name here