InicioMedio Ambiente e PatrimonioNova xornada en Hío: machetas e un par de luvas para atallar...

Nova xornada en Hío: machetas e un par de luvas para atallar os gromos de eucalipto e previr incendios

PUBLICADO O

Continuando co compromiso de acadar un patrimonio natural de máis calidade na nosa contorna, e co gallo do primeiro aniversario da vaga de lumes que aconteceu nos montes das Rías Baixas, o Furatoxo organiza unha nova xornada de eliminación de especies invasoras o vindeiro domingo 28 de outubro.

Nesta ocasión incidirán nunha das máis letais e estendidas no noso monte: o eucalipto. A superficie que ocupan as plantacións de eucaliptos en Galicia non deixa de aumentar ano tras ano, xerando un impacto moi forte sobre a biodiversidade do territorio.

O monocultivo desta especie, unido á ausencia de coidados e podas na superficie rasa, provoca a acumulación de materia combustible e a propagación máis rápida dos incendios. O lugar elixido para esta xornada é Xan Carneiro (ao pé do Outeiro Batente) nunha parcela cedida pola Comunidade de Montes do Hio (Cangas) á cooperativa Pouso da Serra para súa posta en valor e produción.

Contra o eucalipto/ A.C. O Furatoxo

A parcela en cuestión foi talada uns meses atrás, mais xa é necesaria unha nova acción para atallar os gromos de eucalipto que volven ocupar o terreo. A actividade estará guiada por compoñentes dos colectivos convocantes e contará co asesoramento e supervisión do compañeiro David Álvarez Graña, técnico de medio ambiente e forestal e naturalista local que leva anos desenvolvendo actividades de estudio e divulgación do patrimonio natural da comarca do Morrazo.

Xunto aos membros da cooperativa Pouso da Serra será o encargado de realizar o labor de monitor das persoas participantes. Convocan ás interesadas ás 10.30h da mañá nas Porteliñas (no alto do Hío entre as aldeas de Donón, Vilanova, Pinténs e Igresario) no lugar que ocupa actualmente a nave provisional da cooperativa Pouso da Serra.

Contra o eucalipto/ A.C. O Furatoxo

Para desenvolverse correctamente nesta iniciativa será necesario portar machada, machado ou macheta e un par de luvas. Esta xornada de eliminación de especies invasoras trátase da segunda actuación deste tipo que organiza O Furatoxo coa colaboración da cooperativa Pouso da Serra e a Comunidade de Montes do Hio.

A finais do mes de maio, antes da temporada estival, realizaron outra actividade de voluntariado ambiental a prol da conservación do litoral. Nesa ocasión retiraron acacia nas dunas de Nerga e contou coa participación de numerosas veciñas e veciños da parroquia.

ÚLTIMAS

Asistidas un pai e a súa filla en Vigo tras producirse un incendio na súa vivenda

Dúas persoas, un pai e unha filla, necesitaron asistencia en Vigo este xoves tras producirse...

Emilio Sotelino ou a Asociación de Viúvas Demócratas entre os Vigueses Distinguidos 2024

O pleno de Vigo aprobou este luns por unanimidade nunha sesión extraordinaria os novos Vigueses...

O goberno de Vigo aproba o marco orzamentario ata 2027 e prevé investimentos por valor de 33 millóns cada ano

O alcalde de Vigo, Abel Caballero, anunciou que o goberno local aprobou o marco...

Pechados parques e espazos arbóreos da cidade de Vigo debido ao temporal

O Concello de Vigo restrinxiu por seguridade o acceso aos parques e espazos arbóreos...