O FICBueu estréase este venres da man de Javier Tolentino, con “Un blues para Teherán”

Un total de 128 traballos serán proxectados durante os 10 días de certame, que conta con apoio de Xunta, Deputación e Concello.

Público accedendo á Gala de clausura da 13ª edición do FIC Bueu. ADARME VISUAL S.L. / FICBUEU. Arquivo

O director salmantino Javier Tolentino será o encargado de inaugurar este venres, coa proxección do seu traballo ‘Un blues para Teherán’, a 14ª edición do Festival Internacional de Curtametraxes de Bueu (FICBueu).

Este evento estenderase ata o 19 de setembro e constará de nove seccións, tanto competitivas como paralelas, nas que se repartirán os 128 curtos que se van a emitir no marco do certame. Como tronco principal do programa continúa a sección internacional, con dous países diarios entre o 13 e o 17 de setembro.

Pero ás proxeccións hai que sumar actividades complemetarias como talleres, concertos, coloquios, presentaciónes e, mesmo, a emisión do programa de radio ‘Carne crudaa’. Tamén se fará entrega do Premio Cinema Galego FICBueu 2021 ao actor Alfonso Agra.

O festival arrincará o venres 10 cun concerto do dúo Two in The Mirror no Centro Social do Mar. Alí mesmo, a continuación, proxectarase ‘Un blues para Teherán’ coa participación do propio Tolentino.

APOIO INSTITUCIONAL

O certame, xa unha cita tradicional do mes de setembro no municipio de Bueu, conta co apoio económico non só do Concello, senón tamén da Xunta e a Deputación.

Na rolda de prensa de presentación do FICBueu participaron este martes, ademais do alcalde, Félix Juncal; o director da Axencia Galega de Industrias Culturais (Agadic), Jacobo Sutil; a responsable de Cultura do goberno provincial, Victoria Alonso; e a xefa de produción do certame, María Ruiz.

Por parte da Xunta, Sutil incidiu no papel que xogan os festivais á hora de difundir o traballo dos profesionais galegos do cinema e a televisión, así como na creación de públicos.

Ademais, o director de Agadic resaltou o “esforzo” destes eventos para adaptarse a un contexto de pandemia, polo que lembrou algunha das medidas postas en marcha pola Administración autonómica para reactivar o sector cultural.

Cabe lembrar que o FICBueu está integrado no selo ‘Rías Baixas Filme Fest’ da Deputación de Pontevedra, institución que ademais levará ata o festival a súa campaña ‘Lembra, eu decido, ti respectas’ contra o acoso e a violencia machista.

DEIXAR UN COMENTARIO

Please enter your comment!
Please enter your name here