Manifestación este sábado en Teis contra a suba de peaxes e os beneficios millonarios de Audasa

Peaxe / Miguel Núñez

Unha representación da Asociación Veciñal de Teis e de Chapela entregou este martes pola mañá, no rexistro do edificio administrativo da Xunta en Vigo, un escrito dirixido ao Ministro de Fomento, solicitando a convocatoria urxente da comisión bilateral de seguimento da AP-9, da que forma parte o Ministerio de Fomento e a Consellaría de Infraestruturas.

Nesta comisión bilateral de seguimento queren que se trate a eliminación da peaxe no tramo Rande-Vigo, a conversión da autoestrada AP-9 en urbana desde Padín ao centro con acesos e medidas contra o ruído.

O pasado 21 de xuño, ambas asociacións presentamos un escrito dirixido ao novo Ministro de Fomento, José Luis Ábalos Meco, con estas reivindicacións, e despois de tres meses aínda non recibiron ningunha resposta.

“O anterior goberno central de Mariano Rajoy estivo enganándonos anunciando a supresión da peaxe para o mes de xullo, e ao actual goberno central de Pedro Sánchez fáltalle vontade política”, denuncian.

“A prioridade do Ministerio de Fomento é unha nova subida das peaxes este ano, como acaban de anunciar hai unhas semanas, sempre atendendo os intereses da Audasa, unha concesionaria con ingresos millonarios, o pasado 2017 tivo máis de 40 millóns de euros de beneficios. Ademais a autoestrada AP-9, é unha das máis caras do Estado español”, engaden.

Esta mañá tamén informaron de que a Subdelegada do Goberno en Pontevedra vai manter unha xuntanza coas asociacións veciñais de Teis e Chapela, este mércores 26 de setembro ás 12:30 horas, na sede en Pontevedra.

Por último, ambas asociacións convocaaron unha manifestación conxunta este vindeiro sábado 29 de setembro ás 19:00 horas, desde Padín en Teis.

DEIXAR UN COMENTARIO

Please enter your comment!
Please enter your name here