Un incendio forestal activo na localidade pontevedresa de Arbo obrigou a activar a situación 2 de alerta por proximidade do lume a un núcleo de vivendas da parroquia das Searas. O lume, iniciado ás 03,17 horas deste sábado na parroquia de Mourentán, calcinou polo momento 50 hectáreas, segundo as primeiras estimacións da Consellería do Medio Rural.
No lugar traballan nestes momentos 2 axentes, 14 brigadas, 10 motobombas, 1 pa, 2 avións e 3 helicópteros. Tamén se solicitou a colaboración da Unidade Militar de Emerxencias (UME).
En declaracións a Europa Press, o alcalde do municipio, Horacio Gil, asegurou que as condicións meteorolóxicas nestes momentos son “moi adversas” con “moito vento e altas temperaturas”.
Ademais, sinalou que están a aparecer focos en distintos puntos “seguramente polo efecto do vento“. Así mesmo, o rexedor confirmou que polo momento non foi necesario evacuar aos veciños da parroquia das Searas, onde o lume se atopa máis próximo.
