O proxecto Inertimar, de EnergyLab e a Cooperativa de Armadores de Pesca do Porto de Vigo (ARVI), celebrará a súa xornada final este venres, na que presentará os seus avances no deseño dun equipo de tratamento de vísceras para a eliminación sustentable de parásitos da pesca aproveitando a calor residual dos motores dos barcos.
Segundo avanzaron os promotores da iniciativa, na xornada participarán o presidente de Arvi, Javier Touza; o responsable do departamento de I+D de Arvi, Jorge Romón; e o director xerente de EnergyLab, Fernando Val, entre outros expertos.
En concreto, neste evento presentaranse os resultados e conclusións de ano e medio de traballo no marco deste proxecto, que contou co apoio da Fundación Biodiversidade do Ministerio para a Transición Ecolóxica e o Reto Demográfico, a través do programa Pleamar, cofinanciado polo Fondo Europeo Marítimo e de Pesca.
O acto celebrarase o venres na sede de Arvi, en Vigo, a partir das 10,00 horas, aínda que poderá seguirse de forma telemática. As persoas interesadas en asistir, deberán inscribirse previamente na páxina web da Cooperativa de Armadores.
