A situación de contaminación de lindano no Porriño chega á Unión Europea

EU avoga por que a Comisión Europea consigne partidas orzamentarias para descontaminar zonas con presenza de lindano.

Fotografía das zonas do Porriño onde se detectou lindano / Xunta.gal
Zonas do Porriño onde se detectou lindano / Xunta.gal

A portavoz da Plataforma Antilindano da Louriña do Porriño (Pontevedra), Patricia Sío remarcou que este concello conta con 1.000 toneladas de residuos esparexidos en distintas zonas. Por iso, destacou que esta situación chegara á Eurocámara, aínda que asegurou que a resposta que se obteña dependerá de “a tutela que se dea a nivel estatal”.

Tamén criticou que a Xunta non mantivese unha posición “proactiva” respecto diso e o “escaqueo” do Concello do Porriño respecto das súas competencias. Adicionalmente, lembrou que o Goberno galego encargou un estudo sobre a presenza de lindano na zona cuxos resultados non foron trasladados ao goberno local nin á cidadanía. Na mesma liña, o coordinador de Esquerda Unida no Porriño, Pedro Ocampo, lamentou que só se dispuxo duns minutos para abordar un “problema tan grande”.

Este mércores representantes de Ecoloxistas en Acción e de Esquerda Unida levaron a Bruxelas a situación na conca do Gállego, en Huesca, o caso do Porriño,e outros puntos contaminados por este químico na comunidade vasca.

Posteriormente, o Parlamento Europeo pediu á Comisión Europea e ao Goberno de España que remitan información sobre os programas en marcha para a descontaminación de lindano en Aragón, País Vasco e Galicia, e expuxo que o Executivo español invista parte dos fondos de recuperación europeos para pór solución a este problema ambiental.

DEIXAR UN COMENTARIO

Please enter your comment!
Please enter your name here