O Parque Nacional das Illas Atlánticas conta co seu primeiro hotel de insectos

Trátase dun habitáculo para a cría e hibernación de insectos como as abellas silvestres ou avespas escavadoras co fin de preservar os seus ecosistemas.

Vista dende a costa da vela da illa de Cies © Miguel Nuñez

O Parque Nacional Marítimo-Terrestre das Illas Atlánticas conta xa co seu primeiro hotel de insectos, unha iniciativa coa que se facilitará un habitáculo e un lugar de cría e hibernación para este tipo de organismos co fin de preservar os seus ecosistemas.

O proxecto foi inaugurado este martes en Sálvora, coa presenza da conselleira de Medio Ambiente, Territorio e Vivenda, Ángeles Vázquez, e o obxectivo é estendelo ao resto do parque e así contar a medio prazo cunha instalación deste tipo en cada arquipélago.

A asociación Amicos foi a colaboradora esencial para impulsar esta iniciativa no parque. As estruturas están elaboradas a partir de naturais propios da zona, como piñas e restos de madeira, ladrillos perforados ou fragmentos de antigas tellas recicladas.

Esta instalación dará acubillo aos insectos presentes en Sálvora, como abellas silvestres, avespas escavadoras e outro tipo de seres propios da illa.

Ao tempo, permitirán impulsar traballos de educación ambiental e axudarán a divulgar a importancia destes organismos de cara á conservación da biodiversidade e ao equilibrio ecolóxico.

As construcións refuxio situaranse en puntos asollados e protexidos da zona, resgardados do vento e a choiva e próximos a areas con plantas silvestres e arbustos.

DEIXAR UN COMENTARIO

Please enter your comment!
Please enter your name here