O grupo municipal Marea de Vigo criticou este martes a “nefasta xestión” e o “abandono” do patrimonio arquitectónico e etnográfico da cidade por parte do goberno de Abel Caballero, e pediu que se “blinde” ese patrimonio no novo Plan Xeral e mesmo que se destinen fondos do programa ‘Vigo Vertical’ á súa recuperación e posta en valor.
Así o manifestou o portavoz do grupo, Rubén Pérez Correa, quen lamentou a “nula” xestión para preservar o patrimonio industrial, e puxo como exemplo a inminente derriba das instalacións de Cordelerías Mar.
Por outra banda, tamén criticou a actuación en Leira Solita onde, en lugar de facerse unha rehabilitación desta casa indiana, “fíxose unha consolidación da ruína”. “É unha actuación, cando menos, discutible”, apuntou.
Rubén Pérez puxo outros exemplos da “pouca sensibilidade patrimonial” do goberno municipal, como o “abandono” do Pazo da Raposeira, que hai pouco se reintegrou no catálogo de bens do Concello e que o goberno local non rehabilitou “alegando que Fomento non lle daba as axudas” cando gobernaba o PP. “Este ano hai que pedilas outra vez, pero parece que se goberna o PSOE xa non se queren pedir”, incidiu.
O portavoz de Marea tamén mencionou o conxunto etnográfico dos muíños de Viloura, en Castrelos, algúns dos cales “se están matriculando en leiras particulares”; o chalé ‘Agarimo’; ou a Mina Román, en San Roque, que “nin sequera está no catálogo de patrimonio do Concello”.