As Neves esixe á Xunta que free a expansión incontrolada do eucalipto

Eucaliptos na zona de Cabo Ortegal / Pierre en www.flickr.com/photos/pierrepita/2962116512/

Hai pouco máis dun ano que un lume devastador rodeou e cercou o concello das Neves –coma outros moitos do sur de Galicia–, tinguindo de negro todo arredor. Naquel momento e, como reacción ante aquela terrible situación, unha marea de mulleres e homes saíron daquelas cinzas para axudar, co seu traballo voluntario e desinteresado, á veciñanza naquelas necesidades primeiras e urxentes: facilitar auga potable ás casas, repartir comida para os animais, facer un recoñecemento da situación real, axudar nas reclamacións, escoitar… Pero aínda hoxe hai tarefas que seguen sen resolver e que van máis alá do que este grupo de voluntariado pode facer. Por iso, desde o Concello das Neves esixen maior implicación á Xunta.

Para o goberno local, a Administración ten que dar resposta xa a algunhas cuestións urxentes como a recollida de uralita e escombros, “pois todos sabemos das consecuencias e do gasto que isto supón, inasumible por parte dos particulares ou do concello”.

Tamén solicita “frear a expansión incontrolada do eucalipto nos nosos montes que, de seguir así, levaranos nuns anos a estar nunha situación igual ou peor á vivida [en outubro de 2017]”.

O Concello demanda, ademais, unha política forestal axeitada ao territorio e que “non responda somentes a intereses económicos dalgunhas empresas”; ampliar o número de axudas para a rehabilitación das segundas vivendas, así como eliminar trabas burocráticas e esixencias para solicitalas; facilitar asesoramento para a tramitación do cobro de axudas; valorar o patrimonio desaparecido e catalogalo, facilitando o seu coñecemento e reposición, de ser posible; ordenar a limpeza arredor dos cauces dos ríos e revisar o estado das traídas de augas e a súa organización e posta ao día.

O goberno local promete “seguir traballando, loitando e reclamando”, e recoñece o labor dos grupos de voluntarios, coma Voltea, en Ponteareas; Voluntarios de Arbo, Volsa en Salceda, Voluntarios de Guláns, Voluntarios do Freixo… e tamén das comunidades de montes de toda a zona que, “ao igual que as comunidades de montes das Neves, móstranse claramente decididas a traballar na recuperación da nosa contorna, cada un na medida das súas posibilidades e problemáticas, pero todos de maneira altruísta e decididida” para acadar “un cambio necesario na maneira actual de ver o noso monte, porque somos conscientes de que ou é coa nosa implicación, coa de toda sociedade, ou non será”.

Esta fin de semana o Concello das Neves iniciou a reforestación do Sendeiro dos Pescadores co obxectivo final de plantar un total de 10.000 árbores doadas pola empresa ONE OAK. Para esta primeira fase, na que oobxectivo é plantar os primeiros 1.500 árbores, contouse coa colaboración de máis de 100 voluntarios cada día.

DEIXAR UN COMENTARIO

Please enter your comment!
Please enter your name here