Os murais contra a violencia machista que sofriran actos vandálicos no Porriño veñen de ser restaurados a iniciativa do Concello, que aproveitou para facer un chamamento á tolerancia e a poñer fin a calquera expresión de odio. Estas obras, situadas en puntos negros do centro urbano onde se deron agresións machistas, foron instalados pola concellería de Igualdade o pasado 25 de novembro, Día Internacional para a Eliminación da Violencia de Xénero, no marco da campaña “O amor non é violencia”.
Son obras das artistas Eva Casais, Gemma Marqués, Tamara Baz e Lorena Arévalo, que reivindican as relacións de igual a igual entre persoas. Unhas semanas despois de ser instaladas amaneceron con pintadas e, pese a ser borradas, volveron ser atacadas. Ante estes actos vandálicos o alcalde, Alejandro Lorenzo, expresou a súa “condena firme” e recordou que dende o Concello “non se tolerarán comportamentos coma estes que demostran que queda moito por facer a prol da igualdade”.
Pola súa banda, a concelleira de igualdade, Carolina González, acudiu a ver
os traballos de restauración dunha das obras, que desenvolveu a propia
autora, Tamara Baz. “Quen pretenda silenciar as reivindicacións feministas e contra a violencia machista debe saber que non o vai conseguir no Porriño”, advertiu a concelleira, “Queda moito por facer neste eido, pero farémolo con firmeza e sen dar nin un paso atrás”. González explicou que unha vez borradas as pintadas os murais foron cubertos con verniz para que calquera ataque posterior poida borrarse con facilidade e sen lastimar a obra.
