O Parlamento acorda a modernización da liña ferroviaria Vigo-O Porto

A proposición non de lei tamén recolle a aprobación do proxecto do saída sur de Vigo e a súa construción.

Entorno das obras da estación de Adif © Miguel Núñez

As forzas políticas con representación na Cámara galega –PPdeG, BNG e PSdeG– chegaron este mércores a un acordo para instar á Xunta a incluír na axenda poscovid a modernización da liña ferroviaria Vigo-Oporto e a súa consideración como proxecto estratéxico e prioritario para a Eurorrexión.

Os grupos apoiaron este mércores no pleno do Lexislativo galego un texto transaccionado por mor dunha iniciativa defendida na xornada do martes pola deputada do Bloque Nacionalista Galego Alexandra Fernández.

A proposición non de lei aprobada sinala que, co obxectivo de contar cun tren “competitivo, moderno e rápido” que garanta a mobilidade sustentable e segura, a Xunta impulsará ante o Executivo estatal e o Goberno de Portugal varias actuacións.

Entre elas, a modernización da liña ferroviaria, entendida como traxecto de media distancia que dá continuidade ao eixo A Coruña-Vigo; a redacción dun estudo conxunto da rede ferroviaria da área metropolitana de Vigo para a súa vertebración.

Ademais, insta á Xunta a impulsar ante ambas as administracións a inclusión do tramo Vigo-O Porto na rede básica TEN-T do Corredor Atlántico Ferroviario de Mercadorías; así como a promover a aprobación do proxecto da saída sur de Vigo e a súa construción.

Tamén reclama estudar unha alternativa ao paso da vía férrea polo centro do Porriño; completar a electrificación da vía, nunhas condicións homoxéneas a ambos os dous lados do Miño; así como mellorar as condicións de seguridade do trazado e suprimir os pasos a nivel.

Outros puntos propoñen que a Administración autonómica reclame ao Estado, na medida que a situación sanitaria o permita, o incremento da oferta de servizos e mellora da combinación de horarios no traxecto Vigo-O Porto.

Por último, entre outras cuestións, pide solicitar ao Goberno central o acordo coa Xunta das fases e prazos para a execución da modernización da infraestrutura, así como da saída sur de Vigo.

DEIXAR UN COMENTARIO

Please enter your comment!
Please enter your name here