InicioSucesosDetida unha banda de ladróns que roubaba miles de euros de gasoil...

Detida unha banda de ladróns que roubaba miles de euros de gasoil e ferramentas en obras públicas

O grupo criminal operaba en toda a provincia e estaban maquinando un gran roubo nunha casa.

PUBLICADO O

A Garda Civil vén de desarticular un grupo criminal que se dedicaba á subtracción do gasóleo e de ferramentas nas empresas de transportes e en obras en construción. Hai 10 persoas detidas acusadas de polo menos 17 roubos, de gasoil a maioría deles, en obras e empresas de transportes situadas en Ponteareas, O Porriño, Vilaboa, Redondela, Vigo, Fornelos de Montes, Soutomaior e Moaña.

Nalgúns casos, tamén se puido comprobar que subtraían ferramentas e maquinaria. As investigacións levadas a cabo no marco da denominada Operación Caldox iniciáronse o pasado mes de marzo ao ter coñecemento dun importante roubo que se cometeu na obra dun edificio público que se estaba construíndo en Soutomaior, de onde levaron material por valor de 90.000 euros.

Os investigadores determinaron que os integrantes desta banda estaban organizados en dous grupos. Un deles, integrado por catro persoas, eran os encargados de levar a cabo os roubos que planificaban e executaban segundo as demandas que recibían do outro grupo de receptadores, que estaba formado por seis persoas.

O modus operandi empezaba por establecer unha estreita vixilancia das empresas de transporte ou das obras onde pretendían levar a cabo o roubo, que a maior parte das ocasións tiña por obxectivo a subtracción do gasoil dos camións ou da maquinaria, segundo os casos. O asalto realizábano posteriormente durante a noite e subtraían a maior cantidade posible do carburante que atopaban nos depósitos dos vehículos.

Cabe sinalar a modo de exemplo que nun dos casos investigados, concretamente nun grupo de empresas de Redondela, nunha soa noite apropiáronse de preto de 1.000 litros de carburante.

Intervención da Guarda Civil/ Guarda Civil

A explotación da operación iniciouse o día 29 de outubro coas detencións dos dous principais autores materiais dos roubos. Trátase de dous veciños de Redondela e Vigo, con amplos historiais delituosos, en cuxos domicilios se recuperaron algúns obxectos subtraídos e parte das ferramentas que utilizaban para a comisión dos roubos.

Dous días despois, no Porriño, foron detidos nos seus domicilios os seis integrantes do denominado grupo de receptadores. Realizáronse tres rexistros onde se atoparon tres depósitos ilegais, de 1.000 e 3.000 litros de capacidade, que contiñan restos de gasoil bonificado do tipo “ B” destinado para o uso agrícola e industrial, 40 garrafas de 25 litros cada unha, das que utilizaban para o transporte e unha bomba eléctrica portátil, preparada para extraer o gasoil dos depósitos dos vehículos.

Entre os efectos atopados nos rexistros, tamén se recuperaron algunhas ferramentas que foran subtraídas na empresa de mantemento da autoestrada AP-9. Concluíu a operación coa detención doutros dous veciños do Porriño, como integrantes do grupo que participaba na execución dos roubos.

No transcurso da investigación tívose coñecemento de que os catro autores materiais dos roubos, que foron detidos, estiveran controlando os movementos e costumes dun veciño do Porriño para abordalo e retelo dentro dunha furgoneta.

Con este plan, que non se levou a cabo por causas alleas, pretendían subtraerlle a esta persoa as chaves do seu domicilio e entrar na casa para roubarlle o diñeiro e as xoias. As investigacións levadas a cabo polo Grupo de Patrimonio da Unidade Orgánica de Policía Xudicial da Garda Civil da Comandancia de Pontevedra foron tuteladas pola Fiscalía da área de Vigo e polo Xulgado de Instrución número uno de Redondela que decretou o ingreso preventivo en prisión dun dos catro autores materiais e a liberdade con cargos do resto dos detidos.

No despregamento operativo levado a cabo para realizar as detencións e os rexistros, participaron distintas unidades da Garda Civil nesta provincia: Unidade de Seguridade Cidadá de Comandancia ( USECIC), Patrulla Fiscal e Fronteiras ( PAFIF) e o Grupo de Información e Análise de Tráfico ( GIAT), do Subsector de Tráfico da Comandancia.

ÚLTIMAS

Retencións de varios quilómetros na AP-9 ao seu paso por Vigo tras producirse un accidente e unha picada de roda

Un accidente entre un camión e un coche e unha picada de roda doutro...

Por que foi anulado o plan de urbanización do Barrio do Cura?

O xulgado do contencioso administrativo 1 de Vigo ditou sentenza pola que declara nulo...

Os 15 pediatras que obtiveron praza por concurso de méritos na área de Vigo teñen ata o 18 de abril para incorporarse

O Diario Oficial de Galicia (DOG) publicou recentemente dúas resolucións que adxudicaron a 70...

Un milleiro de bailaríns, inscritos xa na XII edición de Vigo Porté, que traerá danza e música ás rúas da cidade a finais de...

Un milleiro de bailaríns inscribíronse xa na XII edición de Vigo Portei, desde que...