A Xunta de Galicia anunciou este xoves a creación do medio millón de metros cadrados de chan industrial entre os municipios pontevedreses de Mos e Redondela, no marco da modificación do Plan Sectorial de Ordenación de Áreas Empresariais de Galicia (PSOAEG).
Así o comunicou a conselleira de Medio Ambiente, Territorio e Vivenda, Anxos Vázquez, que visitou os terreos onde se asentarán eses usos, no concello de Mos, acompañada pola alcaldesa desta localidade, Nidia Arévalo, e por representantes empresariais.
O novo ámbito previsto está proxectado en Louredo e ocupará unha superficie de 498.272 metros cadrados, dos que 371.710 están en Mos e os 126.562 restantes están no termo de Redondela. Mos tamén promoveu a cidade deportiva do celta, un megaproxecto urbanístico de case 900.000 metros cadrados.
Segundo explicou a conselleira, esta zona permitirá dar resposta a gran demanda de chan industrial existente, e lembrou que xa só quedan cinco parcelas por vender no polígono mosense da Veigadaña. Anxos Vázquez recalcou a importancia da revisión do PSOAEG para esta área, pero tamén para o resto de Galicia, e explicou que o documento está en fase de avaliación ambiental, polo que se mantén o obxectivo de aprobalo inicialmente no último trimestre deste ano e, de forma definitiva, ao longo de 2022.