María Pilar Acuña, unha moza de Mos que percorreu o Camiño Portugués da Costa e que realizaba o Camiño de Santiago por segunda vez, converteuse este xoves na peregrina número 50.000 deste ano en Galicia.
O vicepresidente primeiro da Xunta e responsable autonómico de Turismo, Alfonso Rueda, recibiuna no Centro Internacional de Acollida ao Peregrino, ao que chegou cun grupo do proxecto Camiño Verde, unha proposta da ONG Acción Solidaria de Galicia que forma parte do programa ‘O teu Xacobeo’.
María Pilar Acuña recibiu a súa Compostela e a certificación como peregrina 50.000 do ano, así como un libro e unha medalla do Ano Santo. O proxecto Camiño Verde partiu o pasado 6 de xullo da Guarda e percorreu máis de 160 quilómetros do Camiño Portugués da Costa.
