Sae unha oferta para comprar a conserveira Thenaisie e manter 125 empregos

Trátase dun empresario galego que garante os postos de traballo, "con todas as consecuencias para quitala do concurso".

Un empresario galego, que conta con frota propia, presentou unha oferta “sólida” para a compra da conserveira Thenaisie Provote, que entrou en concurso de acredores o pasado mes de maio pola súa situación de insolvencia.

Segundo informa a sindicalista da CIG Rosa Abuín, este xoves tivo lugar unha reunión entre este empresario, representantes dos traballadores e a directora financeira de Thenaisie, na que o investidor galego mostrou o seu compromiso para manter os 125 empregos das dúas plantas do Grove –fábrica de produción– e Mos –loxística–.

A este respecto, Abuín sinala que tamén existen outras ofertas como a dunha compañía catalá, pero que “xera dúbidas” no tocante aos prazos. Así, “unicamente” o empresario galego ofrece a garantía para manter o emprego, “con todas as consecuencias para quitala do concurso”.

Con todo, lamenta as “trabas” por parte da dirección da empresa, cuxo dono é un grupo de alimentación de Romanía, así como dos seus “asesores”. A isto únese que os administradores concursais están “pasivos” para dar unha saída de futuro.

Por iso, a CIG convocou unha manifestación este venres en Vigo a partir das 11,00 horas ante o bufete de avogados que asesora a Thenaisie, ao considerar que é a súa “cara visible” en España. O obxectivo é que accedan a “desbloquear xa” a situación e non se acabe en liquidación.

O XOVES, DATA LÍMITE

Ademais, explica que o empresario galego puxo como data límite o vindeiro xoves para obter unha resposta, dado que se non retirará a súa oferta e non negociará máis con Thenaisie. “Non podemos deixar pasar esta oferta”, deixa claro Abuín. “Non entendemos o que está a pasar”, apunta a sindicalista, para que non se opte por esta posibilidade “habendo comprador que garanta postos de traballo”.

Mentres tanto, a factoría vaise “deteriorando máis” e “perdendo clientes”. Todo iso, tras recorrerse a un ERTE como fórmula para “buscar investidor”, a pesar de que a conserva é un sector “en auxe” debido ao impacto do coronavirus e ser declarado “esencial” durante a pandemia.

CONCURSO

O Xulgado do Mercantil número 2 de Pontevedra declarou en concurso voluntario de acredores á empresa Thenaisie Provote o pasado mes de maio. As facultades de administración e disposición da compañía sobre o seu patrimonio quedaron intervidas pola administración concursal.

DEIXAR UN COMENTARIO

Please enter your comment!
Please enter your name here