O alumnado de 5º de Primaria do CEIP Atín-Cela de Mos impartiu esta mañá na Ludoteca de San Rafael un taller de repostería promovido pola concellería de Participación Cidadá, no que participaron un total de 21 nenos e nenas mosenses.
Estes rapaces e rapazas do CEIP Atín-Cela organizaron conxuntamente coa concellería de Participación Cidadá mosense un obradoiro de cociña no que hoxe prepararon receitas incluídas nun libro escrito por eles mesmos, que leva por título “Recetas para caerse muert@” e que está inspirado na obra de Ledicia Costas, “Escarlatina a cociñeira defunta”.
O obradoiro foi impartido polos propios rapaces e rapazas autores/as do libro de cociña e polo seu mestre, Óscar Rodríguez Rojo, co apoio e colaboración dos/as monitores/as da Ludoteca Municipal de San Rafael (Pereiras), que foi o lugar onde se impartiu este taller esta mesma mañá de sábado.
Esta actividade ía dirixida aos nenos e nenas de 9 a 12 anos de idade que quixeran gozar dunha divertida mañá “coas mans na masa”. O prato estrela que prepararon, titorizados polos pequenos grandes chefs do Colexio de Atín, foron as ‘Chocolletas’, entre outras delicias culinarias.