A xornada deste luns deixou diversos accidentes aparatosos e con varios vehículos implicados nas estradas galegas, os máis destacados á altura de Vigo e en Mos.
Tres coches protagonizaron un choque múltiple na AP-9, á altura do punto quilométrico 159, e tres dos seus ocupantes tiveron que ser trasladados ao centro sanitario do Hospital Fátima de Vigo ao mediodía de hoxe.
O 112 Galicia tivo constancia dos feitos sobre as 14,30 horas e trasladou o aviso a Urxencias Sanitarias de Galicia-061, aos Bombeiros de Vigo e tamén aos voluntarios de Protección Civil da localidade.
Pouco antes, o municipio de Mos rexistraba outro accidente múltiple, con catro vehículos implicados, e que deixou catro persoas feridas.
En concreto, o sinistro produciuse na A-55, á altura do punto quilométrico 14, dirección Vigo, sobre as 14,00 horas, e o 112 solicitou a presenza de efectivos sanitarios, Policía Local, Protección Civil e servizo de mantemento de estradas.
