Galicia rexistra por segunda xornada consecutiva 500 novos contaxios diarios de Covid-19 e os casos activos elévanse a 3.970 –case 400 máis que o día anterior–, mentres que os pacientes hospitalizados ascenden a 107 –dous máis–. Pola súa banda, a taxa de positividade descende lixeiramente a un 7,7 por cento.
Segundo os datos publicados na mañá deste venres pola Consellería de Sanidade con rexistros ata as 18,00 horas deste xoves, aumentan a 13 os pacientes ingresados en UCI pola Covid en Galicia –un máis– e a 94 os hospitalizados noutras unidades –un máis–, mentres 3.863 permanecen en seguimento no seu domicilio.
Por áreas sanitarias, a presión hospitalaria aumenta en tres: Vigo, Ferrol e Pontevedra-O Salnés. Na área de Vigo mantéñense dous pacientes Covid en UCI, pero aumentan a 22 os ingresados noutras unidades –catro máis–.
CASE 4.000 CONTAXIOS
Galicia roza os 4.000 casos activos de Covid tras rexistrar un novo ascenso por vixésimo sexta xornada consecutiva ata os 3.970, que constitúen 397 máis, ao haber máis contaxios (500) que altas (103). As infeccións activas ascenden de novo nas sete áreas sanitarias galegas, coa de Vigo á cabeza (+149) que se coloca xa á cabeza de casos en Galicia, con 1.067.
