O Festival de Cans celebrará un concurso de pintura rápida no Porriño en setembro

Paricipante na primeira edición do certame. FESTIVAL DE CANS

O Festival de Cans acollerá a segunda edición do concurso de pintura rápida ‘Pintar o Cinema’ no Porriño (Pontevedra) o próximo 2 de setembro. A primeira edición desta actividade, enmarcada no evento, tivo lugar en 2019, pero non se puido celebrar de novo o ano pasado debido á pandemia, segundo lembraron os organizadores.

Ante a “mellora en materia sanitaria que se produce por mor da vacinación masiva da poboación“, decidiuse retomar o certame, durante cuxa celebración se cumprirán as medidas establecidas para evitar contagios por covid-19.

A actividade, que patrocina a empresa Galicia de Pinturas (Galpi), terá lugar na contorna da praza do Concello, onde o público poderá observar como os participantes pintan unha obra. A temática do concurso será ‘Pintar o cinema’, polo que os creadores deberán elaborar unha obra que conteña unha escena dunha película coñecida na que se inclúa a silueta característica do festival.

A inscrición poderá realizarse mediante o correo electrónico pinturarapida@festivaldecans.com ata o próximo 15 de agosto. Posteriormente, unha comisión da organización do evento seleccionará as 10 propostas finalistas.

O xurado do certame estará composto por persoas relacionadas co ámbito artístico, entre elas, a directora artística do Festival de Cans, Isis Rodríguez. A proposta gañadora e a segunda mellor valorada recibirán premios de 400 e 200 euros, respectivamente, e figuras realizadas en pedra polo artesán local Paco Candán.