InicioVigo e contornaMosA cidade deportiva do Celta en Mos incumpriu a legalidade urbanística, segundo...

A cidade deportiva do Celta en Mos incumpriu a legalidade urbanística, segundo un xulgado

Unha maxistrada de Pontevedra anula parte da licencia do complexo e obriga a revisar a restante.

PUBLICADO O

Novos problemas para o Celta de Vigo pola cidade deportiva que o club vigués está a erixir en Mos. O Xulgado do Contencioso-administrativo número 3 de Pontevedra vén de acoller o recurso interposto pola Comunidade de Montes Veciñais en Man Común de Tameiga e revogou a licenza de obras concedida en outubro de 2019 polo Concello de Mos ao club.

A decisión, que podería implicar a paralización da construción, vén acompañada dunha condena á administración local, que agora terá que revisar a outra licencia de obra –outorgada en 2018– e sobre a que tamén pesaban diversas denuncias de plataformas veciñais e ecoloxistas. Noutras palabras: que o permiso para construír uns vestiarios queda anulado e o dos campos de fútbol terá que ser sometido a revisión.

A xuíza explica na resolución que o Concello de Mos concedeu a licencia de 2018 “sen a aprobación previa dun plan de dotacións”. Esta problemática levaría a que fora anulado o segundo dos permisos concedidos, datado en 2019, porque estariamos ante obras “indisoluble e ineludiblemente unidas ou asociadas ás licenciadas en primeiro lugar”. Todo porque a construción final se tería visto autorizada “nuns termos alleos aos que esixiría a normativa urbanística de aplicación”, é dicir, a Lei do Solo de Galicia.

O Tribunal recolle así as principais demandas das plataformas ecoloxistas e veciñais. Por unha banda, deixa claro que o proxecto autorizado “ten un alcance […] moi superior ao que se entende por implantación en chan rústico dun campo de fútbol cuns vestiarios”, a obra que, teoricamente, se ía desenvolver.

Pola contra, segundo a maxistrada a construción planeada “encaixa, máis fácil e claramente, no que se denomina ‘equipamento deportivo’; termo que, por outro lado, tería sido empregado polos propios promotores. Na resolución, a maxistrada lembra que a Lei do Solo de Galicia esixe para a autorización da execución de obras en chan rústico que encaixen na definición de ‘equipamentos deportivos’ “a tramitación dun Plan Especial de Dotacións e Infraestruturas, o que fai insuficiente, á hora de telas por correctamente autorizadas, que se lles outorgue licenza directa, sen acudir antes á tramitación do oportuno expediente destinado á aprobación dun plan especial de dotacións”.

MOS DEFENDE A LEGALIDADE DAS OBRAS

O Concello de Mos defendeu este martes a legalidade das obras do complexo deportivo do Celta e atribuíu a sentenza do Contencioso Administrativo 3 de Pontevedra (que obriga a revisar a licenza dos campos de adestramento e anula a dos vestiarios, concedida posteriormente) a unha “cuestión de forma”.

Así, nun comunicado, a administración local confirmou que presentará recurso de apelación ante o Tribunal Superior de Xustiza de Galicia (TSXG), xa que a resolución de primeira instancia “baséase nunha cuestión de forma sobre a vía de concesión dos permisos”, que deberían outorgarse ao amparo dun Plan Especial de Dotacións, pero “non cuestiona que as obras sexan totalmente compatibles e autorizables urbanisticamente en chan rústico”.

Por iso, o Concello subliñou que “as obras non son ilegais” e que foron “avaladas por técnicos municipais”, ademais de contar con informes favorables da Xunta de Galicia, a Confederación Hidrográfica Miño-Sil e a Axencia Estatal de Seguridade Aérea.

En todo caso, se o TSXG ratifica a sentenza do Contencioso, o Concello sinalou que xa ten “moi avanzado” o procedemento de elaboración do Plan Especial de Dotacións, “pendente só de dous informes sectoriais”, polo que “a Cidade Deportiva do Celta sempre quedará apoiada pola legalidade urbanística”.

ÚLTIMAS

Asistidas un pai e a súa filla en Vigo tras producirse un incendio na súa vivenda

Dúas persoas, un pai e unha filla, necesitaron asistencia en Vigo este xoves tras producirse...

Emilio Sotelino ou a Asociación de Viúvas Demócratas entre os Vigueses Distinguidos 2024

O pleno de Vigo aprobou este luns por unanimidade nunha sesión extraordinaria os novos Vigueses...

O goberno de Vigo aproba o marco orzamentario ata 2027 e prevé investimentos por valor de 33 millóns cada ano

O alcalde de Vigo, Abel Caballero, anunciou que o goberno local aprobou o marco...

Pechados parques e espazos arbóreos da cidade de Vigo debido ao temporal

O Concello de Vigo restrinxiu por seguridade o acceso aos parques e espazos arbóreos...