A III Edición do Festival Canto Conto que se celebrou este domingo en Mos contou con dous momentos nos que os cativos e as súas familias gozaron especialmente, a actuación dos monicrequeiros “Titiriteros de Binéfar” (Huesca) e a festa da auga, segundo explicaron a alcaldesa de Mos, Nidia Arévalo, e a concelleira de Cultura e Política Social, Sara Cebreiro.
O festival infantil celebrouse nos exteriores do Pazo de Mos. Esta terceira edición contou coas actuacións de Titiriteros de Binéfar ás 12:00 horas, Mamis e Papis ás 16:00 horas, e Maimiñas e Xingro’s Big Band ás 18.30 horas.
As sesións de contacontos tiveron lugar ás 13.15 horas a cargo de Xarope Tulú e ás 17.30 horas a cargo de A Garavata Torta. Durante todo o día realizáronse obradoiros de arxila, elaboración de galletas e a práctica de infinidade de xogos.
canto conto
O Festival Canto Conto é un evento dirixido ao público infantil e familiar organizado por Reviravolta Producións. Celébrase no Concello de Mos dende o ano 2016, enmarcado dentro da súa semana grande: a Festa da Rosa, en concreto o terceiro domingo do mes de xuño.
Como o seu nome indica, neste festival teñen especial importancia os contos e a música, plasmados en contadas maxistrais e concertos de música en directo. Os contos son uns dos protagonistas do festival. Dende a primeira edición, no ano 2016, foron moitos e bos os contadores os que pasaron polo festival: Servando Barreiro e a súa “Música das árbores” abriu este espazo no primeiro ano.
Ademais dos contos e concertos os nenos e nenas participan en diversos obradoiros, onde dan vía libre á súa imaxinación e aprenden cousas tan divertidas como os pasos de baile básicos do hip hop ou a maneira de facer música coas froitas.
Outro dos grandes protagonistas do Canto Conto son os concertos. En anteriores edicións estiveron grupos e artistas como A Gramola Gominola, O Viravai, Xulio Lorenzo, As Maimiñas, Mamá Cabra, María FumaÇa, Paco Nogueiras, Uxía Lambona e a Banda Molona…
O festival é tamén un bo xeito de achegar aos nenos e nenas ao mundo da arte, por iso durante o mesmo fanse exposicións de artistas coñecidos, e os propios cativos son tamén autores de obras de arte.
Nun evento como o Canto Conto cobran especial importancia a lectura e os libros como elemento de unión entre xeracións. Con espazos adicados a tal fin, non faltan os postos de libros para a venda. Nin tampouco postos de artesanía, xogos populares, pintacaras, obradoiro de arxila e mesmo lugares onde poder penicar algunha que outra cousa rica.
