Protección policial para a alcaldesa do Porriño tras o tiroteo do clan dos Morones e aparecer acoitelada a súa cadela

Eva García de la Torre (segunda pola dereita), na concentración de apoio aos Zamoranos tras ser tiroteados / © Miguel Núñez.

A Subdelegación do Goberno en Pontevedra ordenou a protección policial da alcaldesa do Porriño, Eva García de la Torre, despois de que este domingo matasen a coiteladas a unha das súas cadelas no seu domicilio cando participaba en actos da campaña electoral.

O ataque ás mascotas produciuse horas despois de que a rexedora expresase o seu apoio ás familias coñecidas como os Zamoranos tras o tiroteo rexistrado nunha celebración de pedida de man no pavillón de Torneiros, no que resultaron feridos dous mozos, entre eles unha menor, tras un ataque de membros do clan dos Morones.

Precisamente, os Morones cargaron nas últimas horas contra a alcaldesa do Porriño, a quen acusan de fomentar o enfrontamento cos Zamoranos, e desligáronse do tiroteo a pesar de que as forzas de seguridade buscan a un dos seus membros como presunto autor dos disparos, así como á persoa coa que fuxiu nun coche.

En declaracións aos medios de comunicación este martes, De la Torre afirmou que se alguén pretende “amedrentala” para que non cumpra coas súas obrigacións e responsabilidades, “equivócase”.

“Non vou dar un paso atrás”. “Se hai un clan mafioso” que pretende facer “unha advertencia para que non chame ás cousas polo seu nome, equivócase”, insistiu.

Subliñou que a súa obrigación como alcaldesa é “defender a todos e cada un dos veciños, con independencia da súa etnia, relixión, orixe e condición”, e instou á cidadanía para confiar na investigación policial sobre o tiroteo en Torneiros.

DEIXAR UN COMENTARIO

Please enter your comment!
Please enter your name here