A factoría viguesa da compañía automobilística Stellantis volverá parar a súa produción no sistema 1, onde se montan os Peugeot 301 e 2008 e o Citroën C-Elysée, por falta de aprovisionamentos os próximos luns e martes, 14 e 15 de novembro.
“Por causa de forza maior, a consecuencia da falta de aprovisionamentos, suspéndese a actividade do Sistema 1 nas xornadas do luns, 14 de novembro, e martes 15″, informaron desde a compañía aos traballadores.
Así, Stellantis Vigo prevé volver á actividade na súa liña 1 a partir do mércores, día 16 de novembro, ás 06,00 horas.
REDE DE MOI ALTA TENSIÓN
Precisamente sobre Stellantis Vigo falou este xoves en rolda de prensa o alcalde, Abel Caballero, quen indicou que a fábrica e a cidade contarán coa rede eléctrica de moi alta tensión.
“Díxeno hai un mes e quéroo volver repetir”, reivindicou Caballero, que non deu máis detalles sobre esta infraestrutura, pero insistiu en que Stellantis si contará con ela.