A Asociación de Industrias do Metal e Tecnoloxías Asociadas de Galicia (Asime) e a Asociación Empresarial A Pasaxe urxiron a regularización do polígono industrial situado na parroquia de Vincios (Gondomar) para non lastrar o “crecemento industrial” do sector na comarca.
Precisamente na mañá deste venres ambas as asociacións analizaron a situación do proceso de regularización do polígono, que foi xa aprobado polo Concello de Gondomar e atópase pendente da validación definitiva por parte do Concello de Vigo e da Xunta de Galicia.
“Con esta regularización, esperada durante décadas polas 70 empresas situadas no polígono da Pasaxe, preténdese dar solución a unha falta de regularidade urbanística que está a lastrar o crecemento industrial do sector da comarca”, reivindicaron as dúas asociacións.
Neste sentido, o presidente da Asociación Empresarial A Pasaxe, Javier Díaz, destacou que o feito de carecer de licenza de actividade no polígono “dificulta enormemente a consecución de grandes contratos internacionais e mesmo programas de apoios públicos”, onde este é un “requisito indispensable”.
“Estamos a perder competitividade e a posibilidade de pechar novos contratos que levan carrexada carga de traballo e empregos. Confiamos en que todas as administracións implicadas poidan dar o empuxón definitivo a esta reclamación histórica do polígono antes do mes de agosto”, engadiu.
Pola súa banda, o secretario xeral de Asime, Enrique Mallón, lembrou que o polígono é de “vital importancia” para o sector industrial galego. “Estamos a falar de máis de 70 empresas que teñen un compromiso firme co emprego e que, de non poder regularizar a súa situación, veríanse abocadas a deslocalizarse a outros polígonos ou mesmo a outras rexións“, lamentou.
“É algo que non podemos permitir, e confiamos en que todas as administracións das que depende esta regularización poidan actuar o máis axiña posible para que os traballadores poidan irse de vacacións en agosto sabendo que as súas empresas teñen as garantías necesarias para a continuación da súa actividade”, sentenciou.
O proceso de regularización do polígono atópase xa licitado, á espera do visto e prace definitivo por parte das administracións. Os empresarios levan tres meses á espera dese desbloqueo final, que consideran “crucial para o futuro da comarca e o seu desenvolvemento empresarial”.
