O Bloque Nacionalista Galego (BNG) de Vigo solicitou a paralización cautelar das obras para o proxecto de seis novos chalés en Cabo Estai ante as “graves irregularidades” denunciadas pola Asociación Veciñal de San Miguel de Oia.
Así, os nacionalistas reclamaron que se aclaren estas “anomalías” antes de continuar coa construción desta urbanización en primeira liña de costa.
“Falamos dun proxecto a poucos metros do litoral que, máis aló do seu evidente impacto paisaxístico e ambiental, está envolvido en dúbidas e sospeitas fundadas, mesmo sobre a titularidade real de parte dos terreos que se pretenden incorporar na construción”, indicou o concelleiro do BNG, Xabier Pérez Igrexas.
Por iso, pediu acceso á integridade do expediente urbanístico co que o Concello deu o visto e prace para a concesión da licenza municipal do proxecto.
“Unha licenza que foi outorgada ademais no tempo de desconto, a poucos días de que se decretase a suspensión das mesmas pola aprobación inicial da modificación do novo PXOM”, subliñou o edil nacionalista.
